Aıtýly is-shara sanaly ǵumyryn kitap isine arnaǵan ardager kitaphanashylarǵa qurmet kórsetýmen bastaldy. Jasy toqsanǵa taıaǵan Kúlásh Aıazbekova bastaǵan ardagerler qyzyl kilem ústimen júrip ótip, ótken kúnniń ónegesi jaıly estelikterimen bólisti. Ǵımarat dálizinen úılesimdi oryn alǵan «Ulttyń jady – Ulttyq kitaphanaǵa 115 jyl» atty kórme taǵylym ordasynyń ótkeni men búgininen syr shertedi. Onda Ulttyq kitaphananyń qalyptasý kezeńderi, damý joly, basshylyq etken tulǵalar týraly mol derekter qamtylǵan.
Is-sharanyń resmı bóliminde sóz alǵan Prezıdenttiń keńesshisi Málik Otarbaev, ordaly ujymdy mereıli belesimen quttyqtap, Memleket basshysy Qasym-Jomart Toqaevtyń quttyqtaýyn oqyp berdi.
«Qadirli qaýym, sizderdi Ulttyq kitaphananyń qurylǵanyna 115 jyl tolýymen quttyqtaımyn. Bul – halqymyzdyń rýhanı ómirindegi aıtýly beles. Ulttyq kitaphana ǵylym men bilimdi, mádenıet pen ónerdi, sondaı-aq aǵartýshylyq qyzmetti damytý isinde aıryqsha ról atqarady. Munda sırek kezdesetin kitaptardyń, qoljazbalar men ǵylymı eńbekterdiń biregeı qory jınaqtalǵan. Osy teńdessiz murany kózdiń qarashyǵyndaı saqtap, keler urpaqqa jetkizý óte mańyzdy. Sizder bul mindettiń mánin tereń túsinip, ultymyzdyń zııatkerlik áleýetin kúsheıtý jolynda tabysty eńbek etip kelesizder. Barshańyzǵa shynaıy rızashylyǵymdy bildiremin! Búginde irgeli mekeme ujymy halyqaralyq uıymdarmen tyǵyz baılanys ornatyp, kásibı biliktiligin zaman talabyna saı jetildirip jatyr. Kitaphanada qolǵa alynǵan ınnovasııalyq bastamalar men jobalar oqyrman qaýymǵa usynylyp otyrǵan sıfrlyq sheshimder osynyń aıqyn dáleli. Ulttyq kitaphana ujymy aldaǵy ýaqytta da jańashyl jáne jasampaz isterge uıytqy bolady dep senemin. Barshańyzǵa amandyq, zor tabys tileımin», delingen Quttyqtaý hatta.
Mereıtoı aıasynda kitaphana ujymynyń zamanaýı baǵyttaǵy bastamalary, sıfrlyq qordy damytý, oqyrmanmen jumys formatyn jańǵyrtý sekildi jobalar tanystyryldy. Sondaı-aq kitaphananyń ár jyldardaǵy qyzmetin qamtıtyn tarıhı derekter arqyly onyń ulttyq mádenıet pen bilim keńistigindegi róli atalyp ótti.
Parlament Májilisiniń depýtattary, Mádenıet jáne aqparat mınıstrliginiń ókilderi, mádenıet jáne qoǵam qaıratkerleri, zııaly qaýym ókilderi, aqyn-jazýshylar, óner salasynyń mamandary, ardager kitaphanashylar men oqyrmandar qatysqan mazmundy is-sharada birqatar vedomstvo basshylarynyń, qala men oblys ákimderiniń quttyqtaý hattary tabystalyp, halyqaralyq uıymdardyń beınequttyqtaýy kórsetildi.
Jazýshy Beksultan Nurjekeev «Kóp biletin adamdar bar, biraq bárin biletin adam joq. Bárin biletin – kitap. Rýhanı ómirimizdiń aınasy, ultqa qyzmet etýdiń jarqyn ónegesi – kitaphana. О́mirin osy ıgilikti ispen ushtastyrǵan jandarǵa alǵys bildiremin», dep kitaphanashylarǵa júrekjardy lepesin jetkizdi.
Al aqyn Aqushtap Baqtygereeva ádebıet alyptarynyń kitaphanadaǵy qyzyqty oqıǵalaryn baıandap, óziniń alǵash osy kitaphanaǵa aıaq basqandaǵy oqyrman bıletin kórsetti.
«Biz kitaphananyń tarıhymen qatar ómir súrgenderdiń bireýimiz. Bul kitaphana jaıynda jazýshylar ortasynda qyzyqty dúnıeler kóp. Ospanhan Áýbákirov stýdent kezinde osy kitaphanaǵa jaqsy kóretin qyzyn kezdesýge shaqyrypty. Sol kúni qatty jer silkinip, Ospanhan birinshi qabattyń terezesinen sekirip qashyp ketse kerek. «Sóıtip, men osylaısha, jaqsy kórgen qyzymnan aıyrylyp qaldym» degen eken Áýbákirov. Qadyr Myrzalıev
6 767 kitabyn týǵan jeri Oraldaǵy Qadyr ortalyǵyna kóshirip aldy. Qadyrdy bilmeıtin qazaq joq desek, sol 6 767 kitaptyń betterinde Qadaǵań qoıǵan belgi bar. Endeshe, sondaı aqyn bolý úshin qansha kitap oqý kerek bolǵan. Ábish Kekilbaıuly sonaý Mańǵystaýdyń túkpirindegi eshqandaı kitap barmaıtyn, poıyz ben ushaq qatynamaıtyn túkpirde otyryp, búkil aýyl men aýdannyń kitaphanasyn mektepte júrip taýysypty. Sondyqtan da, onyń basy kompıýterden de myqty edi, kez kelgen taqyrypty tereń biletin. Bul – kitaptyń mańyzyn, qasıetin kórsetetin dúnıe», deıdi A.Baqtygereeva.
Saltanatty jıyn aıasynda «Júlgesi úzilmegen 115 jyl» atty aqyndar músháırasynyń jeńimpazdary marapattaldy. Baıqaý jas qalamgerlerdi qoldaýǵa jáne poezııa arqyly kitaphana qundylyǵyn nasıhattaýǵa baǵyttalǵan.
Aıta keteıik, Ulttyq kitaphana 1910 jylǵy 31 jeltoqsanda Vernyı qalalyq kitaphanasy retinde negizi qalanyp, keıingi tarıhı kezeńderde óńirlik jáne respýblıkalyq mártebeler berildi. Al 2020 jyly Memleket basshysynyń Jarlyǵymen «Ulttyq» mártebesi bekitildi.
ALMATY
