Foto: massaget.kz
QHA-nyń 30 jyldyǵyn keń kólemde atap ótý – durys baǵytta júrgizilip jatqan saıasattyń taǵy bir dáleli. Kúni búginge deıin el kóleminde 10 myńnan asa áleýmettik mańyzy bar is-shara ótkizildi. Onda 3 mıllıonnan asa otandasymyz boı kórsetti.
Beıbitshilik pen ózara kelisimniń jarshysy sanalatyn uıymnyń mereıli belesin merekeleý tek mańyzdy oqıǵalarmen ǵana emes, ıgi istermen de este qaldy. Máselen, QHA janyndaǵy «Jomart jan» ortalyǵynyń mesenattary 35 myń azamatqa jalpy somasy 305 mıllıon teńge kóleminde kómek kórsetti.
Búginde QHA aıasyna 1000-nan astam etnomádenı birlestik pen 4 myń qoǵamdyq qurylym biriktirilgen. Olar otbasylyq qundylyqtardy nyǵaıtýda jáne jastardy rýhanı-adamgershilik tárbıege baǵyttaýda «Mádenıetti ana – mádenıetti ult», «Adal azamat», «Salaýatty sana» jobalaryn júıeli júzege asyryp keledi. Oǵan qosa «Aqsaqaldar keńesi» men «Analar keńesi» de bar. Onyń ústine bıyl alǵash ret Almaty, Jambyl, Jetisý jáne Túrkistan oblystarynda aýdandyq assambleıalar quryldy.
Etnosaralyq kelisimdi nyǵaıtýǵa baǵyttalǵan memlekettik saıasatty júzege asyratyn tıimdi júıe qalyptasyp úlgerdi. Onyń negizinde óńirlerge turaqty túrde zertteý júrgizilip, monıtorıngtik issaparlar uıymdastyrylady.
Baıqasaq, «Assambleıa jastary» jastar qanatynda 10 myńnan astam jas tirkelgen. Olar kóbine mádenıetaralyq dıalogty damytýǵa járdemdesedi. Atap aıtsaq, «Jańa tolqyn», «ANK jetekshiler mektebi» jáne «50 jas kóshbasshy» jobalary bar. Sondaı-aq elimizdegi joǵary oqý oryndarynda etnos ókilderin biriktiretin Stýdenttik Assambleıa da turaqty jumys isteıdi. Basty mindet – jergilikti jerde volonterlik qyzmet pen etnomedıasııany damytýǵa úles qosý.
Al ǵylym men bilimdi damytý, zertteý jumystaryn júrgizý maqsatynda joǵary oqý oryndarynda Assambleıanyń 42 kafedrasy bar. Ǵylymı-eksperttik keńes jáne Jas ǵalymdar klýby da ashylǵan. Onda 360 sarapshy qyzmet etedi.
Keıingi kezderi elimizde etnojýrnalıstıka salasy qarqyndy damyp keledi. Respýblıka kóleminde 50-den astam etnıkalyq gazet pen jýrnal 11 tilde basylyp shyǵady. QHA janyndaǵy Jýrnalıster klýbynda jetekshi buqaralyq aqparat quraldarynyń 500-ge jýyq ókili bar.
Assambleıanyń shyǵarmashylyq ujymdary Assosıasııasy da quryldy. Oǵan 170-ten astam ansambl kirdi. Búginde elimizdiń etnosaralyq kelisim úlgisi halyqaralyq deńgeıde keńinen tanylýda. Ideıany ilgeriletýge Assambleıa janynan halyq dıplomatııasy ortalyǵy men Dostyq elshileri korpýsy jumyldyrylǵan. Erekshe atap óterligi, «Assambleıa jastary» uıymy IýNESKO men Eýropa Keńesiniń halyqaralyq jastar qurylymdaryna kirip, óz bastamalaryn Parıjdegi IýNESKO shtab-páterinde tanystyrdy.
