Foto: Sputnik/Abzal Kalıev
Osy jyldyń qazan aıynda Qazaqstan ulttyq quramasynyń burynǵy qaqpashysy Andreı Morev 52 jasynda dúnıeden ozdy.
Andreı Morev «Jeńis», «Oqjetpes», «Tobyl» jáne «Aqtóbe» syndy komandalar sapynda óner kórsetken. «Aqtóbe» sapynda eki dúrkin Qazaqstan chempıony atanyp, el Kýboginiń ıegeri boldy. 2005 jyly elimizdegi eń úzdik qaqpashy ataǵyna laıyq dep tanyldy.
Andreı Morev Qazaqstan ulttyq quramasynyń qatarynda eki match ótkizgen. Debıýttik oıynynda qarsylas bolǵan Túrkııa quramasynyń penaltıin sátti qaıtaryp, jankúıerlerdiń qoshemetine bólengen edi.
Jarys aldynda tolyq medısınalyq tekserýden ótse de Almatydaǵy Salomon Trail taý jarysy kezinde 70 jastaǵy sportshy Vladımır Krıvensov kóz jumdy.
Uıymdastyrýshylardyń aıtýynsha, qart sportshy jarys bastalǵan tusta qulap, densaýlyǵy syr bergen. Tótenshe jaǵdaılar qyzmetiniń mamandary ile-shala alǵashqy medısınalyq kómek kórsetip, «Medeý» muz aıdyny keshenindegi qutqarý bólimine jetkizgen. Dárigerler sportshyny aman alyp qalýǵa bar kúsh-jigerin salǵanmen, sportshy qaıtys bolǵan.
Vladımır Krıvensov sportpen kásibı túrde aınalysqan. Polıatlon, prezıdenttik jáne qysqy kópsaıys túrlerinen Qazaqstannyń birneshe dúrkin júldegeri bolǵan. Ol sporttyq jarystarǵa únemi qatysyp júrgen belsendi sportshy retinde el esinde qalary sózsiz...
Orny tolmas qazanyń biri – Qazaqstannyń birinshi lıgasynda óner kórsetetin «Han Táńiri» klýbynyń oıynshysy Dıas Tóleýdiń jasyl alańda jan tapsyrýy. Qaıǵyly oqıǵa «Han Táńiri» – «Ekibastuz» matchynyń 64-shi mınýtynda bolǵan. 19 jastaǵy shabýylshynyń densaýlyǵy kenet nasharlap, ony alańnan zembilmen alyp shyqqan. Kóp uzamaı oıynshynyń qaıtys bolǵany resmı túrde jarııalandy. Fýtbolǵa degen súıispenshiligi joǵary jas talant «Qaırat» akademııasynda tálim alǵan.
Bıyl «Aqtóbe» fýtbol klýbynyń 15 jastaǵy fýtbolshysy Aron Musa da ómirden ótti. Jas daryn Aron Musa men ájesi, nemere aǵasy gazdan ýlanyp baqılyq bolǵany belgili boldy.
Bıyl qazaq halqy «Qaırattyń» burynǵy bapkeri, Qazaqstan U-19 jasóspirimder quramasynyń aǵa jattyqtyrýshysy ári «Qaırat» FK akademııasynyń jetekshisi Kırıll Kekerden de aıyrylyp qaldy. Ol uzaq jyl «Qaırat» fýtbol klýbynyń qurylymynda eńbek etip, akademııada jas fýtbolshylardy shyńdaýmen aınalysqan. 2022–2024 jyldar aralyǵynda almatylyq klýbtyń negizgi komandasyn tizgindegen, sonymen qatar 2024 jyly «Ordabasy» fýtbol klýbynyń bas bapkeri qyzmetin atqarǵan. Kırıll Keker fýtbolshy retinde de jurtshylyq jadynda. Ol «Qyzyljar», «Oqjetpes», «Suńqar» jáne «Shyǵys» komandalarynyń sapynda qorǵaýshy bolyp dop tepken.
Jeltoqsanda Almaty – Bishkek tasjolynda bolǵan jol apaty 5 sport ardageriniń ómirin jalmady. Qaıǵyly oqıǵa Bishkektegi fýtbol týrnırinen qaıtyp kele jatqanda bolǵan.
Qaza tapqan sportshylardyń esimi:
- Asyl Ibraımov – estý qabileti shekteýli sportshylardyń fýtboldan jattyqtyrýshysy;
- Dmıtrıı Mochalskıı – sýrdlımpııalyq chempıon, shahmattan Eýropa chempıony;
- Sáken Smaǵulov – fýtbol ardageri, estý qabileti shekteýli ulttyq quramanyń oıynshysy;
- Sergeı Volkovınskıı – fýtbol ardageri, ulttyq qurama múshesi;
- Serik Moldashev – fýtbol ardageri, ulttyq komanda oıynshysy.
Qazaq sportynyń bedelin bıiktetý jolynda ter tókken sportshylardyń jarqyn beınesi jadymyzda qalary sózsiz...
Buǵan deıin 2025 jyly Qazaqstan sportshylary qandaı tarıhı jeńisterge qol jetkizgeni týraly jazǵan edik.
