Konserttik baǵdarlamaǵa Prezıdenttik orkestr solısteri Erkebulan Sársenbekov pen Baýrjan Nurmuhanov oryndaǵan «Elim dep soqsyn júregiń», «Abyroı» tobynyń «Rýh», Ibragım Eskendirdiń oryndaýyndaǵy «Saýyt» sekildi tanymal patrıottyq ánder endi. Saltanatty sharada Prezıdenttik polktyń «Aıbyn» saltanatty bólimshesi men «Sardar», «Kókjal» arnaıy bólimsheleriniń kóz tartarlyq kórsetilimderi qoıyldy.
Memlekettik kúzet qyzmeti Erekshe maqsattaǵy kúshter shtabynyń qyzmetkeri, polkovnık Medet Elemesovtyń aıtýynsha, qazaq halqynyń birtýar ulynyń beınesi SGO-nyń jekelegen baǵyttarynyń sımvolıkasynda kórinis tapqan. Sondaı-aq Baýyrjan Momyshulynyń áskerı is jónindegi eńbekteri men jaýyngerlik tájirıbesi tereń zerttelip jatyr.
«Bizdiń jeke quram soǵys jyldarynda daryndy qolbasshy, taktık jáne strateg retinde tanylǵan qaısar tulǵany qasterlep, onyń jarqyn beınesin esinde saqtaıdy. Baýyrjan Momyshulynyń erligi, batyrlyǵy, Otanǵa adaldyǵy týraly jastar bilýi mańyzdy», dedi Medet Elemesov.
Prezıdent orkestriniń bastyǵy, podpolkovnık Darhan Rahımǵalıev performanstyń ıdeıasy – ańyzǵa aınalǵan qolbasshyǵa tiri arnaý ekenin atap ótti.
«Elimizdiń ótkeni men bolashaǵy bir birimen tyǵyz baılanysty. Búgingi konsert batyrdyń jarqyn beınesi jas urpaqtyń esinde saqtalyp, eren erligi el qorǵaǵan árbir azamattyń boıynan kórinis tabatynyn kórsetti», dedi Darhan Rahımǵalıev.
Plas-konserttiń sońynda Memlekettik tý saltanatty túrde ákelinip, Prezıdent orkestri solısteriniń oryndaýyndaǵy «Kók aspan» atty patrıottyq áni oryndaldy.
