Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva mýzeı salasy eldiń mádenı-rýhanı damýy men tarıhı murasyn saqtaý úshin erekshe mańyzdy ekenin atap ótti. Onyń aıtýynsha, búginde jahandaný men sıfrlandyrý úderisi mádenıet salasyna da jańa talaptar júktep otyr. Osy oraıda Memleket basshysy mádenı murany sıfrlandyrýǵa erekshe kóńil bóletini de sóz etildi.
«Ulttyq muramyzdy saqtaý, ǵylymı aınalymǵa engizý jáne keń aýdıtorııaǵa qoljetimdi etý – memleketimizdiń mádenı saıasatynyń basym baǵyttarynyń biri. Mýzeı salasyn sıfrlandyrý onyń halyqaralyq deńgeıde tanylýyna jáne nasıhattalýyna erekshe áser eteri sózsiz», dedi A.Balaeva.
Búginde elimizde 280-nen astam respýblıkalyq, óńirlik mýzeı jáne mýzeı-qoryq jumys isteıdi. Mýzeı qorlarynda 4,5 mıllıonnan astam eksponat saqtalǵan. Mýzeılerge jyl saıyn 6 mıllıonnan astam adam keledi.
Aıta keteıik, E-museum portaly elimizdegi mýzeı qorlaryn biryńǵaı sıfrlyq platformaǵa biriktiredi. Atalǵan joba mádenı qundylyqtardy ǵylymı turǵyda sıpattap, halyqaralyq mádenı keńistikte tanystyrýdy maqsat etedi. Sondaı-aq sheteldik mýzeılermen, ǵylymı ortalyqtarmen, mádenı uıymdarmen aqparattyq, ǵylymı yntymaqtastyqty damytýǵa yqpal etedi.
Joba kezeń-kezeńimen júzege asyrylyp, naqty nátıje kórsetti. Máselen, 2023 jyly júıege 33 mýzeı qosyldy. 15 myńnan astam mýzeı eksponaty sıfrlyq formatqa kóshirilip, 50 úshólshemdi model jasaldy.
Al 2024 jáne 2025 jyldar qorytyndysy boıynsha júıege elimizdiń memlekettik mýzeıleri tolyq endi. Júıege elimizdiń barlyq óńirinen 252 mýzeı qosyldy. Sıfrlyq katalogke 66 myńnan astam mýzeı qorynyń birligi endi. 750 úshólshemdi model ázirlendi. Budan bólek kórermenge arnalǵan mýzeı ekspozısııalarynan turatyn 15 vırtýaldy týr bar.
Jańa joba óńirlik mýzeılerdiń áleýetin arttyryp, qashyqtyqqa qaramastan, mádenı murany qoljetimdi etýge múmkindik beretini sózsiz. E-museum jobasynyń damýy elimizdiń halyqaralyq mádenı ımıdjin nyǵaıtýǵa sep bolady.
