2025 jylǵy 11 aıdyń qorytyndysy boıynsha jalpy aýyl sharýashylyǵy óniminiń kólemi 6,1%-ǵa artyp, 9,2 trln teńgege jetti. Bul týraly Úkimettiń bir jyldyq qyzmetiniń qorytyndylaryna arnalǵan baspasóz máslıhatynda Aýyl sharýashylyǵy mınıstri Aıdarbek Saparov málimdedi.
О́simniń negizgi draıveri egin sharýashylyǵy boldy, onda óndiris kólemi 7,6%-ǵa artyp, 5,8 trln teńgeni qurady. Mal sharýashylyǵynda kórsetkishter 3,5%-ǵa ósip, 3,3 trln teńgege jetti.
«Bul kórsetkishter salanyń naqty kólem ındeksi 113% bolǵan byltyrǵy joǵary bazadan bastaý alǵan óndiristiń naqty ósimin kórsetedi. Bul búginde agrosektorda ótken jyldarǵa qaraǵanda edáýir kóp ónim óndiriletinin bildiredi», dep túsindirdi vedomstvo basshysy.
Aıta keterligi, bıyl eksportqa rekordtyq kólemdegi 13,4 mln tonna astyq jiberildi, bul – buryn-sońdy bolmaǵan kórsetkish. Jemdik undy qosa alǵanda, mundaǵy kólem 15 mln tonnadan asty. Al jańa orylǵan eginnen búginde 3,9 mln tonna astyq eksporttaldy, bul ótken jyldyń sáıkes kezeńimen salystyrǵanda 13,6%-ǵa artyq. Elimizdiń jalpy eksporttyq áleýeti 13 mln tonnaǵa baǵalanady. Otandyq dıqandardyń ónimi 45 memleketke jetkiziledi.
«Qarqyndy eksport ishki naryqty turaqtandyrýda sheshýshi ról atqarady. О́ıtkeni elimizde astyq ishki qajettilikten 2-3 ese kóp jınalatyndyqtan, onyń artyǵyn eksporttaý el ishindegi baǵa qysymyn jeńildete túsedi. Joǵary eksport degenimiz – tek ımıdj ǵana emes, bul tikeleı ekonomıkalyq paıda. Elimizge odan ulttyq valıýta baǵamyn qoldaıtyn valıýtalyq kiris túsedi. Dıqandar syrtqy naryqqa astyq satýdan túsken tabysyn tehnıkany jańartýǵa jáne óndiristi damytýǵa ınvestısııalaı alady», deıdi mınıstr.
Agrotehnologııalardy saqtaý men ýaqtyly memlekettik qoldaý kórsetý aýyl sharýashylyǵy kórsetkishteriniń sapaly ósýin qamtamasyz etti. Eger 2023 jyly ortasha ónimdilik 11 s/ga bolǵan bolsa, 2025 jyly ol 17 s/ga-ǵa deıin ósti, al ozyq sharýashylyqtarda 40 s/ga-ǵa deıin jetti. Munda egin egý men egin jınaý jumystaryn jeńildikpen qarjylandyrý (750 mlrd teńge, 8,5 mln ga alqap) sheshýshi faktorǵa aınaldy. Bul rette memleket 2026 jylǵy egin egý naýqanyn qarjylandyrýǵa qazan aıynan bastap kirisip ketti.
«Búginde 230 mlrd teńgege 1,3 myńnan astam ótinim kelip tústi, onyń ishinde 81 mlrd teńgege 750-den astam aýyl sharýashylyǵy taýaryn óndirýshiler qarjylandyryldy. Qol jetkizilgen nátıjelerdi tyńaıtqyshtardy engizý kóleminiń 3 esege (1,8 mln tonnaǵa deıin) artýymen jáne aýyl sharýashylyǵy tehnıkasynyń tozýy 80%-dan 70%-ǵa deıin tómendegeninen kórýge bolady», deıdi Aýyl sharýashylyǵy mınıstri.
Egis alqaptaryn belsendi ártaraptandyrýǵa ári dándi emes daqyldardyń joǵary ónimdiligine baılanysty elimizdegi saqtaý ınfraqurylymyn jańǵyrtý qajettiligi týyndady.
«Egin sharýashylyǵynda saqtaý ınfraqurylymynyń jetkiliksizdigi – ósimge kedergi keltiretin faktor bolyp otyr. Osyǵan baılanysty elevatorlardy keńeıtý, jańǵyrtý jobalaryna arnalǵan jeńildetilgen nesıe berý baǵdarlamasy ázirlenýde, ony 2026 jyldyń birinshi jartyjyldyǵynda iske qosý josparlanyp otyr», dedi A.Saparov.
Memleket basshysynyń tapsyrmasyna sáıkes, salany damytýdyń 2026–2030 jyldarǵa arnalǵan keshendi josparyn júzege asyrý 2026 jyldan bastalady. Mınıstr keltirgen ózekti derekter boıynsha iri qara mal sany 8,3 mln basqa, qoı men eshki 21,3 mln, jylqy 4,4 mln basqa jetken. Ári qaraı ósý úshin qujat aınalym qarajatyn tolyqtyrýǵa, asyl tuqymdy mal satyp alýǵa, shalǵaı jatqan jaıylymdar ınfraqurylymyn damytýǵa jeńildikpen nesıe berýdi kózdeıdi. Sondaı-aq etti mal sharýashylyǵyndaǵy aýstralııalyq tájirıbeni jergilikti jerge beıimdeý boıynsha qanatqaqty jobalar júzege asyrylyp jatyr. Mınıstrdiń sózinshe, mal sharýashylyǵyn qoldaý kólemin keleshekte arttyra otyryp, keminde 200 mlrd teńge qarjy bólý josparda tur. Atalǵan qarajat sonymen qatar qarqyndy ósimge negiz bolatyn analyq mal ımportyna jumsalady.
Aýyl sharýashylyǵy vıse-mınıstri Ermek Kenjehanulynyń aıtýynsha, 2025 jyldyń qyrkúıeginde 144 bıznes-úderisti sıfrlandyrýdy kózdeıtin AО́K sıfrlyq transformasııasynyń jańartylǵan kartasy bekitildi.
Búginde salada Gosagro.kz, Aýyl sharýashylyǵy janýarlaryn sáıkestendirý, «Biryńǵaı avtomattandyrylǵan basqarý júıesi» jáne E-Fish sııaqty aqparattyq júıeler belsendi jumys isteıdi. Gosagro.kz júıesinde memlekettik qoldaý sharalaryn qamtıtyn 200 myńnan astam paıdalanýshy bar. Bir jyl ishinde júıe arqyly 188 myńnan astam ótinim berildi. Sonymen qatar aýylsharýashylyq kartalaryn ashyq formatta sıfrlandyrý aıaqtaldy.
