Osydan biraz jyl buryn Qazaqstandaǵy sharýa qojalyqtary, túrli sharýashylyqtar qarapaıym ǵana traktorǵa asa muqtaj boldy dep búginde kim oılaıdy? Egis alqabynda jumys isteýge qajetti bir ǵana traktordy shetelden satyp ákelý úshin qomaqty qarajat kerek bolǵandyǵy ras.
Toǵyz jyl buryn osy problema sheshimin tapty. Semeıde «Belarýs» markaly traktorlardy shyǵaratyn Qazaq-Belarýs óndiris orny iske qosyldy. Alǵashqy kúnnen bastap, temir tulparlardy jasaýǵa zaýyttaǵy sheber Nurjan Esbaev ta tartyldy. Jaqynda ol jáne onyń áriptesteri 7 myńynshy traktordy jasap shyǵardy.
On saýsaǵynan óner tamǵan Nurjan Esbaev Semeı qalasynda týyp-ósken. №37 mektep-gımnazııanyń túlegi. Ol jas kezinen ata-ana úmitin aqtap, jaqsy oqydy. Bilikti maman ıesi atandy. Qazaqstandaǵy «QazAgro» júıesiniń qoldaýymen «SemAZ» mashına jasaý zaýytynda «Belarýs» traktoryn jasaýdyń sheberi atandy. Nurjannyń ákesi balalaryn avtomobıldiń ishki qurylymy, mashına jasaý salasymen tanystyratyn. Eki ulyn ertip garajdaǵy kóliginiń ana jeri, myna jerin shuqylap, qalaı jóndeýdi úıretetin. Sóıtip júrip olar kiltterdiń túrin, tetikterdi, tipti kólikti aınadaı ǵyp jaltyratyp qoıyp, tazalap shyǵýdy da úırendi.
Sondyqtan bolar, Nurjan mektep bitirgende basqa qatarlastary sııaqty joǵary oqý ornyna túsýge umtylmaı, kólik kolledjine qaraı bet burdy. Onyń ústine ol tehnıka salasyn birshama meńgerip te úlgergen edi. Akkýmýlıatorsyz, qozǵaltqyshsyz ómiriniń bir kúnin de elestete almaıtyn boldy. Kólik kolledjin támamdaǵanyna jyl ótkende Semeıde jańadan avtobýs quraıtyn zaýyt ashyldy. Jas maman birden jumysqa qabyldandy. Biraq, bas kezinde qarajat jetimsiz bolyp, jumysshylar biraz bos júrip qaldy. Ýaqytty tekke ótkizbeý úshin Nurjan Semeıdegi ýnıversıtetke mashına qurylysy fakýltetine oqýǵa túsedi. Sóıtip júrgende ol zaýytta traktor jasaıtyn seh ashylǵandyǵynan habardar boldy.
Sóıtip, mine, toǵyz jyl ishinde ol traktordyń qyr-syryn tolyq meńgerdi. 2011 jyly dıplomyn alǵan soń, ony zaýytta joǵary bilimdi maman retinde traktor jasaıtyn júıeniń sheberi jumysyna aýystyrdy. Búginde onyń qaramaǵynda 40 qurastyrýshy 15 post boıynsha jumys isteıdi. Nurjan osynda jasalyp jatqan ár traktordy búge-shigesine deıin tekseredi. Kún saıyn olar 7 traktor jasaıdy. Aıyna 150-160 traktor shyǵarylady. Al jylyna 1500 traktor Qazaqstandaǵy alqaptarǵa attanady. Bularǵa elimiz ǵana emes, Reseı de tapsyrys beredi.
– Jumysymdy sapaly túrde atqarǵandy jaqsy kóremin, – deıdi Nurjan sheber, – elimizdiń gúldenýine, ekonomıkamyzdyń órkendeýine úles qosýdy zor mártebe sanaımyn. Jáne jastardy osy mamandyqty meńgerýge shaqyramyn.
Raýshan Nuǵmanbekova,
jýrnalıst.
Semeı.
