Mereke kúnderi elimizde qoǵamdyq tártipti qorǵaý jáne órt qaýipsizdigin baqylaý kúsheıtilip, rezervtik kúshter daıyndyqqa keltirildi. Ishki ister mınıstriniń orynbasary Igor Lepeha kóshelerdegi polısııa patrýlderi tyǵyzdyǵynyń artýy jáne strategııalyq nysandarda, azamattar kóp jınalatyn oryndarda táýlik boıy kezekshilik uıymdastyrý týraly baıandady.
El óńirlerinde barlyǵy 1 myńnan astam buqaralyq is-shara josparlanǵan, olardyń basym bóligi balalardyń qatysýymen ótedi. Osyǵan baılanysty Premer-mınıstr Ishki ister mınıstrligine Tótenshe jaǵdaılar mınıstrligimen birlese otyryp, josparlanǵan is-sharalardyń qaýipsiz ótkizilýin qamtamasyz etý úshin barlyq qajetti sharalardy qabyldaýdy jáne táýlik boıy patrýldik jáne kezekshi quramnyń jumysyn uıymdastyrýdy tapsyrdy.
«Bizdiń mindet – is-sharalar ótetin jerlerde quqyq buzýshylyqtar men qylmystyń aldyn alý jumystaryn qamtamasyz etý. Kósheler men qoǵamdyq oryndarda qylmystardyń profılaktıkasynyń tıimdi júıesin qurǵan jón. Jaǵdaıdy baqylaýǵa alyp, onyń ishinde beınekameralar arqyly vızýaldy baqylaý uıymdastyrý qajet. Qajet bolǵan jaǵdaıda oqıǵalarǵa shuǵyl áreket etý sharalaryn qamtamasyz etińizder. Sondaı-aq adamdar kóp jınalatyn nysandarda lańkestik shabýyldardyń aldyn alý úshin keshendi profılaktıkalyq sharalar qabyldansyn. IIM men TJM-ǵa kúsheıtilgen rejimde jumys isteý tártibine kóshýdi tapsyramyn», dedi Premer-mınıstr.
Mereke kúnderi órt qaýipsizdigin qamtamasyz etý máselesine de kóńil aýdaryldy. Is-sharalardyń basym bóligi adamdar kóp jınalatyn nysandarda, sondaı-aq oıyn-saýyq jáne qoǵamdyq oryndarda ótedi. Onyń ishinde pırotehnıkalyq ónimder de qoldanylady. Búginde aınalymnan 700-den astam jáne 97 qorap sertıfıkattalmaǵan pırotehnıka alyndy. Mereke qarsańynda taǵy bir márte «Quqyqtyq tártip» profılaktıkalyq is-sharalaryn ótkizý tapsyryldy. Onyń aıasynda pırotehnıkalyq ónimderdi saqtaý, satý oryndaryna reıdter uıymdastyrylatyn bolady.
О́rt qaýipsizdiginiń tıisti deńgeıin qamtamasyz etýge basa nazar aýdaryldy. TJM kúshterimen adamdar kóp jınalatyn 7 myńnan astam nysanǵa tekserý júrgizildi jáne órt qaýipsizdigi boıynsha anyqtalǵan zańbuzýshylyqtar joıyldy. Jańajyldyq is-sharalar ótkiziletin oryndar tekserilip, paıdalanýǵa ruqsat berildi. Halyqtyń áleýmettik osal sanatyndaǵy azamattar turatyn turǵyn úılerde órtke qarsy datchıkterdi montajdaý jalǵasýda. Qazirgi ýaqytta 36 myńnan astam qorǵanys qurylǵylary ornatylǵan.
Premer-mınıstr is-sharalar ótkiziletin nysandardaǵy qaýipsizdiktiń tıisti deńgeıin qamtamasyz etýdi tapsyrdy. Osy maqsatta nysandarda aldyn ala tekserý, qyzmetkerlerge tıisti nusqaýlar berý, oqý-jattyǵý jumystaryn júrgizý qajettigine nazar aýdardy. Ásirese órt sóndirý quraldary men gıdranttardyń jaramdylyǵyn tekserý qajet. Aýa raıyna qaramastan, adamdar kóp jınalatyn nysandarǵa baratyn joldar táýlik boıy ashyq bolýy kerek. TJM men IIM birlesip, tıisti sharalar qabyldaýǵa tıis. Sonymen qatar adamdardy shuǵyl evakýasııalaý boıynsha is-qımyldardy pysyqtap, qajet bolsa, qosymsha oqý-jattyǵýlaryn ótkizý qajet.
Mereke kúnderi qala ishinde de, shyǵaberis joldarynda da avtomobıl trafıgi artýyna baılanysty avtomobıl joldarynda erekshe baqylaý ornatyldy. Qutqarýshylar aýa raıynyń nasharlaýyna daıyn, avtojoldarda jylytý pýnktteri jabdyqtalǵan, arnaıy tehnıka men avıasııa jedel den qoıý rejimine aýystyryldy. IIM Kólik mınıstrligimen birlesip, avtomobıl joldaryndaǵy qaýipsizdik sharalaryn kúsheıtedi. Jol qozǵalysy erejeleriniń saqtalýyn, avtojoldardyń jaı-kúıin, sondaı-aq júktemesi úlken jáne týrıstik baǵyttarda qaýipsiz jol qozǵalysyn uıymdastyrýdy baqylaýǵa alady. О́ńirlerde balalardy tasymaldaýda mindetti túrde polısııa qyzmetkerleri birge erip júrýge tıis. Ákimderge bul máseleni erekshe baqylaýǵa alý tapsyryldy.
Qysqy demalys pen jańa jyldyq mereke kúnderi mektep jasyndaǵy balalardyń bos ýaqytyn qyzyqty sharalarmen tolyqqandy qamtamasyz etý mańyzdy. Oqý-aǵartý mınıstrligine qaýipsizdik sharalary, sonyń ishinde qys mezgilindegi qaýipsizdik sharalaryn túsindire otyryp, qosymsha ata-analar jınalystaryn ótkizý tapsyryldy.
«О́ńir ákimdikterine aldaǵy merekelerdi qaýipsiz ótkizý boıynsha keshendi profılaktıkalyq sharalardy qabyldaýdy tapsyramyn. Energetıka mınıstrligi ákimdiktermen birlesip, energetıkalyq obektilerde qaýipsizdikti jáne olardyń aqaýlarsyz jumys isteýin qamtamasyz etsin. Jylytý jáne sýmen jabdyqtaý júıeleriniń barlyq parametrlerin saqtap, jedel áreket etý úshin jóndeý brıgadalarynyń kezekshilik kestesin jasaý qajet. Jalpy alǵanda, barlyq memlekettik organdar men qurylymdar mereke kúnderin sátti jáne tynysh ótkizý úshin jan-jaqty sharalar qabyldaýy kerek», dep atap ótti O.Bektenov.
Sonymen qatar jıyn barysynda turmystyq zorlyq-zombylyq, balalardy qaraýsyz qaldyrý jáne resıdıvtik qylmysqa qarsy kúres jónindegi normalardy biriktiretin Parlament qabyldaǵan «Quqyq buzýshylyqtardyń aldyn alý týraly» jańa biryńǵaı zańdy júzege asyrýǵa nazar aýdaryldy.
«Jańa profılaktıka júıesi Prezıdent memleket pen qoǵam jumysynyń myzǵymas ustanymdarynyń biri retinde aıqyndaǵan «Zań men tártip» qaǵıdatyn qamtamasyz etýge baǵyttalǵan. Zańnyń jańalyqtarynyń biri – azamattar men jergilikti qoǵamdastyqty quqyq buzýshylyqtardyń aldyn alý jumystaryna tartý jáne olardy yntalandyrý. Bul degenimiz – barlyǵy profılaktıkany júzege asyrady degen sóz. Mundaı tájirıbe barlyq elde tıimdi qoldanylyp keledi. Ony tıimdi iske asyrý qajet. Sonymen qatar zańda óskeleń urpaqty tárbıeleý boıynsha jańa tásilder qaralǵan, bul – qazirgi ýaqytta óte ózekti másele. Jasandy ıntellektini paıdalaný quqyq buzýshylyqtardyń profılaktıkasy boıynsha jedel sharalardy aldyn ala boljaýǵa jáne ázirleýge múmkindik beredi», dep atap ótti Premer-mınıstr.
Memlekettik organdarǵa zańdy júzege asyrýǵa baǵyttalǵan barlyq normatıvtik quqyqtyq aktilerdi ázirleý men qabyldaýdy jedeldetý tapsyryldy. Ákimder jergilikti deńgeıde quqyq buzýshylyqtardyń aldyn alý júıesin qurýdy jáne onyń jumys isteýin qamtamasyz etýge, azamattardy quqyqtyq tárbıeleýge erekshe nazar aýdarýǵa tıis.
Premer-mınıstr kámeletke tolmaǵandar jasaǵan quqyq buzýshylyqtardyń sanyn azaıtý maqsatynda birqatar tapsyrma berdi. Ishki ister mınıstrligine túngi ýaqytta patrýlder men reıdter júrgizý sheńberinde kámeletke tolmaǵandardyń eresekterdiń qaraýynsyz bolý faktileriniń jolyn kesý tapsyryldy. О́ńirlerdiń ákimderi – ásirese ishki ister organdarynda esepte turǵan balalardy bos ýaqytymen qamtýdy ulǵaıtý qajet.
Eńbek jáne halyqty áleýmettik qorǵaý mınıstri Svetlana Jaqypova áleýmettik kómek áleýmettik táýeldilik pen quqyq buzýshylyqtyń aldyn alýmen tikeleı baılanysty ekenin aıtty. «Bir tereze» qaǵıdaty boıynsha qyzmet kórsetetin 153 otbasyn qoldaý ortalyǵy jumys isteıdi. Osy jyldyń basynan beri ortalyq mamandary 76 myń azamatqa 111 myńnan astam qyzmet kórsetti, bul qıyn ómirlik jaǵdaıda otbasylardy keshendi súıemeldeýdiń tıimdiligin kórsetedi.
Budan bólek, buryn sottalǵan adamdar tarapynan qylmystarǵa jol bermeý jónindegi sharalar qaraldy. Osylaısha, jańa zań barlyq bosatylǵan azamattar úshin oıyn-saýyq oryndaryna barýǵa jáne túngi ýaqytty ótkizýge shekteýler bar ákimshilik qadaǵalaýdy engizedi. Elimizde 2 402 tósektik orynǵa arnalǵan 27 áleýmettik beıimdeý ortalyǵy bar. Jelini keńeıtý, sondaı-aq jumys berýshilerdi azamattardyń osy sanatyn jumysqa ornalastyrýǵa yntalandyrý jóninde usynystar engizildi. Eńbek jáne halyqty áleýmettik qorǵaý mınıstrligi otbasynyń sıfrlyq kartasy jáne FSM Social platformasy arqyly belsendi qyzmet kórsetý jáne jumyspen qamtýǵa járdemdesý boıynsha jumys júrgizip otyr.
Bıyl Memleket basshysynyń tapsyrmasy boıynsha ýákiletti memlekettik organdar óńirlik komıssııalardyń jumysyna taldaý júrgizdi. Ákimdikterge komıssııanyń jumys tártibin jańa tásilderdi eskere otyryp qaıta formattaý tapsyryldy.
Otyrys qorytyndysy boıynsha qoǵamdyq qaýipsizdikti, kóshi-qon jaǵdaıyn jáne taǵy basqalardy qamtamasyz etý tujyrymdamasyn júzege asyrý máselelerin qamtıtyn vedomstvoaralyq komıssııanyń kelesi jylǵa arnalǵan jumys jospary bekitildi.
