Otyrysqa Ulttyq bank tóraǵasy Tımýr Súleımenov, Premer-mınıstrdiń orynbasary – Ulttyq ekonomıka mınıstri Serik Jumanǵarın, Premer-mınıstrdiń orynbasary Qanat Bozymbaev, Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev, Prezıdent Ákimshiligi basshysynyń orynbasary Erbolat Dosaev, Qarjy, О́nerkásip jáne qurylys mınıstrlikteriniń, Qarjy naryǵyn retteý jáne damytý, Strategııalyq josparlaý jáne reformalar agenttikteriniń basshylyǵy men taǵy basqalar qatysty.
Bıylǵy 11 aıdyń qorytyndysy boıynsha el ekonomıkasynyń ósýi 6,4%-dy qurady. Makroekonomıkalyq turaqtylyqty qamtamasyz etý men halyqtyń tabysyn arttyrý maqsatynda Prezıdent tapsyrmasyna oraı ázirlengen Úkimettiń, Ulttyq bank pen Qarjy naryǵyn retteý jáne damytý agenttiginiń 2026–2028 jyldarǵa arnalǵan halyqtyń ál-aýqatyn turaqtandyrý men arttyrý jónindegi birlesken is-qımyl baǵdarlamasy júzege asyrylyp jatyr. Júrgizilip otyrǵan bıýdjettik-salyqtyq reformalar fıskaldyq saıasatty jańǵyrtýǵa ári bıznes úshin ákimshilik kedergilerdi keshendi túrde tómendetýge baǵyttalǵan.
Sondaı-aq jıynda kelesi jyldyń negizgi syrtqy jáne ishki syn-qaterleri qaraldy, jahandyq ekonomıkadaǵy ósimniń baıaýlaýy týraly boljamdar bar trendter usynyldy.
Keńes músheleri ekonomıkanyń turaqty ósýin qamtamasyz etý, ónimdi jumys oryndaryn qurý men medıandyq jalaqy mólsherin arttyrý boıynsha aldaǵy sharalardy talqylady. Naryqty otandyq taýarlarmen tolyqtyrýǵa baǵyttalǵan ımportty almastyrýǵa qatysty júrgizilip jatqan jumystar, onyń ishinde «Investısııaǵa tapsyrys» baǵdarlamasy halyqtyń tabysyn qoldaýǵa yqpal etpekshi.
Otandyq ónimderdiń sapasyn jaqsartý men zamanaýı tehnologııalardy engizý arqyly básekege qabilettiligin arttyrýdyń mańyzdylyǵy atap ótildi. Búginde elimizdiń ekonomıkasy álemdik naryqtarǵa daıyn ónim eksportyn ulǵaıta otyryp, shıkizat eksportynan josparly túrde bas tartyp jatyr, bul óz kezeginde ártaraptandyrylǵan qurylymnyń qalyptasqanyn aıǵaqtaıdy.
Buǵan qosa ınfraqurylymdyq jobalardy júzege asyrýdaǵy jeke ınvestısııalardyń úlesin arttyrýǵa nazar aýdaryldy. Ekonomıkanyń naqty sektoryn qarjylandyrýdaǵy ekinshi deńgeıli bankterdiń rólin arttyrý men sheteldik ınvestısııalardy mýltıplıkatıvtik áseri bar iri jobalarǵa baǵdarlaý qajettigi aıtyldy.
Premer-mınıstr ınflıasııa deńgeıin tómendetý mindetine basymdyq beriletinin atap ótti. Bul jerde másele azyq-túlik pen azyq-túlik emes taýarlardyń, qyzmetter baǵasynyń turaqty tómendeýi týraly bolyp otyr.
«Kúrdeli syrtqy konıýnktýraǵa qaramastan, elimizdiń ekonomıkasy damý ústinde. Qurylymdary boıynsha qarasaq, óńdeý, qurylys, saýda men kólik salasy ósý úderisinde. Iаǵnı ósim teń jaǵdaıda júrip jatyr. Biz ınflıasııa boıynsha tómendeý úrdisin kórip otyrmyz. Baǵytymyz – ınflıasııany tómendetý boıynsha aldymyzǵa qoıylǵan mindetterdi sapaly oryndaý», dedi Oljas Bektenov.
Otyrys qorytyndysynda Ulttyq ekonomıka mınıstrligine Ulttyq bankpen, Strategııalyq josparlaý jáne reformalar, Qarjy naryǵyn retteý jáne damytý agenttikterimen birlesip, ekonomıkalyq ahýalǵa monıtorıng júrgizý men yqtımal táýekelderdiń aldyn alý jóninde kelisilgen is-qımyldardy jedel júzege asyrý tapsyryldy.
