Palata otyrysynda senatorlar «Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (IýNESKO) arasyndaǵy Qazaqstanda IýNESKO aıasyndaǵy 2-sanatty ortalyq retinde Ortalyq Azııa óńirlik glıasıologııa ortalyǵynyń mártebesin qaıta jalǵastyrý týraly kelisimdi ratıfıkasııalaý týraly» zańdy qarap, maquldady. Depýtattar bul zańdy qabyldaý glıasıologııa ǵylymynyń odan ári damýyna, sondaı-aq sý jáne azyq-túlik qaýipsizdigi máselelerin sheshýge yqpal etetinin atap ótti.
Sonymen qatar senatorlar «Qazaqstan Respýblıkasynyń Qylmystyq kodeksine jáne Qazaqstan Respýblıkasynyń Qylmystyq-prosestik kodeksine tolyqtyrýlar engizý týraly» zańdy maquldady. Zań medısına qyzmetkerlerin qyzmettik mindetterin oryndaý kezinde olarǵa qatysty kúsh qoldanýdan qorǵaýdy kúsheıtýge baǵyttalǵan. Endi medısına qyzmetkerleri men jedel járdem brıgadalarynyń júrgizýshilerine qatysty kúsh qoldaný qaterin tóndirgeni úshin 200-den 500 aılyq eseptik kórsetkishke deıin aıyppul salý nemese sol mólsherde túzeý jumystary tartý qarastyrylady. Sondaı-aq 300 saǵatqa deıin qoǵamdyq jumystarǵa tartý ne eki jylǵa deıin bas bostandyǵyn shekteý túrinde jaza kózdeledi. Aýyrlatatyn mán-jaılar bolǵan kezde 2 jyldan 3 jylǵa deıin bas bostandyǵynan aıyrý qarastyrylǵan.
Senatorlar Memleket basshysynyń Qazaqstandy jappaı sıfrlyq elge aınaldyrý jónindegi tapsyrmasyn oryndaý maqsatymen ázirlengen Qazaqstan Respýblıkasynyń Sıfrlyq kodeksin jáne «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańyn da qarap, maquldady.
«Prezıdent Qasym-Jomart Toqaev bıylǵy Joldaýynda elimizdi úsh jyldyń ishinde sıfrlyq memleketke aınaldyrý jóninde mańyzdy mindet júktedi. Búgin qaralǵan jańa Sıfrlyq kodeks osy maqsatqa qol jetkizý úshin quqyqtyq negiz qalyptastyrady. Kodekste sıfrlyq orta obektileri men sýbektileri aıqyndaldy. Sondaı-aq sıfrlyq memlekettik basqarý, onyń ishinde sıfrlyq úkimettiń quqyqtyq tetikteri belgilendi. Qaýipsizdik máseleleri de nazardan tys qalǵan joq. Jalpy, bul kodeksti qabyldaý – ýaqyt talabyna saı jańa tehnologııalardy barlyq salada etene engizýge jol ashatyny anyq. Osylaısha, jańa normalar memlekettik basqarýdy ońtaılandyrýǵa, qyzmetterdiń sapasyn arttyrýǵa jáne ekonomıkamyzdy jańǵyrtýǵa oń septigin tıgizedi dep senemiz», dedi M.Áshimbaev.
Sonymen qatar otyrys barysynda Qazaqstan Respýblıkasynyń Qurylys kodeksi men oǵan ilespe «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgerister men tolyqtyrýlar engizý týraly» zań jáne «Qazaqstan Respýblıkasynyń keıbir zańnamalyq aktilerine sıfrlandyrý, kólik jáne kásipkerlik máseleleri boıynsha ózgerister men tolyqtyrýlar engizý týraly» zań, sondaı-aq «Qazaqstan Respýblıkasyndaǵy bankter jáne bank qyzmeti týraly» zań men oǵan ilespe «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» zań eki oqylymda qaraldy.
«Búgin Memleket basshysynyń tapsyrmasymen ázirlengen jańa Qurylys kodeksin qaradyq. Kodekste qurylys obektilerin josparlaý jáne salý sapasyn arttyrýǵa baǵyttalǵan normalar qamtyldy. Sondaı-aq sáýlet, qala qurylysy jáne qurylys qyzmeti salasynda memlekettik baqylaýdy kúsheıtetin tetikter engizildi. Búgin qaralǵan taǵy bir mańyzdy qujat – «Bankter jáne bank qyzmeti týraly» jańa redaksııadaǵy zań. Bul saladaǵy ózgerister bank sektorynyń turaqtylyǵyn qamtamasyz etýge jáne azamattarǵa kórsetiletin qyzmetterdiń sapasyn arttyrýǵa oń septigin tıgizedi dep senemiz», dedi Senat tóraǵasy.
Talqylaý nátıjesinde senatorlar atalǵan zańdardy konseptýaldy túrde qoldap, olarǵa birqatar túzetý engizýdi usyndy. Naqty aıtqanda, Qurylys kodeksi memlekettik ınvestısııalar esebinen qarjylandyrylatyn qurylys obektileri úshin mindetti bolyp tabylatyn, «bir tereze» qaǵıdaty boıynsha jobalardy ázirleý men olarǵa saraptama júrgizýdi uıymdastyrýǵa arnalǵan portalda qurylys obektileri boıynsha jobalaý-smetalyq qujattamany ázirleý úderisin uıymdastyrý jónindegi normamen tolyqtyryldy. Sonymen qatar paıdalanýshynyń mindetinen jeke turǵyn úı qurylysy aýmaǵynda áleýmettik, kóliktik jáne ınjenerlik ınfraqurylym obektilerin salý men paıdalanýdy qarjylandyrýdy alyp tastaýdy kózdeıtin ózgeris engiziledi.
Senatorlardyń bankter týraly zańǵa qatysty engizgen túzetýleri bazalyq banktik lısenzııasy bar bankti ámbebap banktik lısenzııasy bar bankke kóshirý (qaıta resimdeý) kezinde prýdensıaldyq normatıvter men lımıtterdi saqtaý jónindegi talaptardy naqtylaýǵa baılanysty ekenin atap ótken jón. Sondaı-aq zańdy el aýmaǵynda tólem kartochkalaryn paıdalana otyryp júzege asyrylǵan bankaralyq tólemder jáne (nemese) aqsha aýdarymdary boıynsha esep aıyrysýlardyń aıaqtalýyn qamtamasyz etýge arnalǵan, ortalyq depozıtarııdegi jáne (nemese) klırıngtik uıymdaǵy aqshany jáne (nemese) baǵaly qaǵazdardy qaryz alýshydan daýsyz tártippen óndirip alýdy boldyrmaıtyn normamen tolyqtyrý týraly usynystar aıtyldy.
Osylaısha, atalǵan zańdar senatorlardyń usynystarymen Májiliske qaıtaryldy.
Senat otyrysynda M.Áshimbaev palatanyń bıylǵy jumysyn qorytyndylap, Prezıdent tapsyrmasymen osy jylda qabyldanǵan birqatar mańyzdy zańǵa nazar aýdardy. Senatorlar jyl basynan beri eldiń saıası jáne ornyqty áleýmettik-ekonomıkalyq damýyn qamtamasyz etýge arnalǵan 102 zańdy qarady.
«Prezıdent Qasym-Jomart Toqaevtyń tikeleı tapsyrmasymen jyl basynda jańa Bıýdjet jáne Salyq kodeksteri qabyldandy. Osylaısha, fıskaldy jáne salyq saıasaty túbegeıli qaıta qaraldy. Sondaı-aq sý resýrstaryn tıimdi paıdalanýǵa zańnamalyq negiz qalyptastyratyn jańa Sý kodeksi qabyldandy. Kúndelikti ómirde belsendi qoldanysqa enip otyrǵan jasandy ıntellekt salasyndaǵy qoǵamdyq qatynastardy retteıtin jasandy ıntellekt týraly jańa zań maquldandy. Elimizdiń bas qarjy qujaty – úsh jylǵa arnalǵan respýblıkalyq bıýdjetti qabyldadyq. Túrkistan qalasyna erekshe mártebe beretin zań da bekitildi. Alaıaqtyqqa qarsy is-qımyldy kúsheıtýdi kózdeıtin normalar maquldandy. Osy jáne basqa da zańdar el ıgiligine qyzmet etedi dep senemiz», dedi palata spıkeri.
M.Áshimbaev óz sózinde Senattyń turaqty komıtetteriniń zańnamalyq jumys nátıjelerine, parlamenttik tyńdaýlar, úkimet saǵattary, kóshpeli otyrystar jáne óńirlerdegi ózekti máselelerdi sheshýdi kózdeıtin basqa da is-sharalardyń qorytyndylaryna toqtaldy.
«Senattyń turaqty komıtetteri zań shyǵarý qyzmetimen qatar, palata josparyna sáıkes 5 úkimet saǵatyn, 50-den asa kóshpeli otyrys, 100-ge jýyq dóńgelek ústel men kezdesýler ótkizdi. Osy jumystyń aıasynda Prezıdent tapsyrmalarynyń, zańdardyń jáne memlekettik baǵdarlamalardyń oryndalý barysy jan-jaqty talqylandy. Buǵan qosa, áriptesterimiz 130-dan asa depýtattyq saýal joldap, Úkimetke ózekti máselelerdi sheshý joldaryn usyndy. Palata qyzmeti aıasynda 140-qa jýyq halyqaralyq is-shara uıymdastyryldy. Bıyl máslıhattarmen ózara is-qımyl jónindegi keńestiń qyzmeti sapalyq jańa formatqa kóship, alǵash ret keńeıtilgen otyrysy ótkizildi. «Bir el – bir múdde» jáne «О́ńir» depýtattyq toptary, Senatorlar keńesi, «Ulttyq múdde» dıalog alańy, «Taldaý mektebi», Inklıýzııa jónindegi keńester jalpy sany 16 otyrys uıymdastyrdy. Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi Parlamenttik komıssııanyń nátıjeli úsh otyrysy ótkenin de aıta ketken abzal», dep M.Áshimbaev senatorlar aldaǵy jylda da Memleket basshysy bergen tapsyrmalardyń iske asyrylýyn zańnamalyq turǵydan qamtamasyz etý jolyndaǵy belsendi jumysty jalǵastyra beretinin aıtty.
