Foto: Ashyq derekkóz
Depýtat Erlan Saırov «Báıterek» holdıngi men «Qazsınktiń» 70% aksııasyna ıelik etetin shveısarııalyq «Glencore» kompanııasyn qatań synǵa aldy.
«Eksporttaýshylardy qarjylandyrý baǵdarlamasy aıasynda bólingen shamamen 1 trln teńge qarajattyń 35%-yn «Qazsınk» AQ alǵan. Eksportty qoldaýdyń maqsaty − otandyq joǵary tehnologııalyq ónimniń halyqaralyq naryqtarǵa shyǵýyn qamtamasyz etý. Bul jerde «Qazsınktiń» qandaı qatysy bar? «Qazsınk» jartylaı fabrıkattardy eksporttaıdy. Eń qyzyǵy, kompanııa bırjada saýda jasaıtyndyqtan, aldyn ala tólemmen jumys isteıdi. Sonda transulttyq «Glencore» korporasııasyn ne úshin nesıelendirýmiz kerek?», dedi E.Saırov.
Onyń aıtýynsha, «Glencore» Qazaqstanda bolǵan 20 jyl ishinde joǵary tehnologııaly otandyq ónimniń birde-bir kirpishin qalap kórmegen. Májilis depýtaty memlekettik qarajattyń Qazaqstandaǵy sheteldik kompanııalardy qoldaýǵa ne sebepti jumsalyp otyrǵanyn surady. Depýtat bul suraǵyn «Báıterek» ulttyq holdınginiń basshysy Rýstam Qaraǵoıshınge qoıdy.
Rýstam Qaraǵoıshın «Qazsınktiń» Qazaqstan Respýblıkasynyń ıýrısdıksııasynda tirkelgen otandyq kompanııa ekenin jáne «Báıterek» holdıngi úshin qarjylandyrýǵa ótinim bergen kez kelgen otandyq kásiporyn klıent bolyp esepteletinin aıtty.
«Biz ótinimdi qarap, onyń negizdiligi men bizdiń talaptarǵa sáıkestigi bolǵan jaǵdaıda qanaǵattandyrýymyz kerek. Eksporttyq baǵyt – kúrdeli sala. Biz Qazaqstan eksportynyń neden turatynyn jaqsy bilemiz. Bul syrtqy naryqtarǵa shyǵarylatyn 10 negizgi ónim. Qazir joǵary tehnologııalyq baǵyttarǵa kóbirek kóńil bólinip otyrǵany túsinikti. Alaıda olar jumys istep turǵan salalarmen salystyrǵanda baıaý damyp jatyr. Kez kelgen eksport elge valıýta túsimin ákeledi, bıýdjetke qosymsha kiris beredi. Sondyqtan biz otandyq eksporttaýshylardy qoldaýǵa tyrysamyz», dedi Qaraǵoıshın.
Ol sondaı-aq qazirgi kezde metallýrgııa salasynyń da syrtqy naryqtarda qıyndyqtarǵa tap bolyp otyrǵanyn, sol sebepti holdıng Qazaqstan eksportyn qoldaýǵa tyrysatynyn aıtty.
