Foto: egemen.kz/Erlan Omar
Pedagogterdiń quqyn buzý faktileriniń basym bóligi zań qabyldanǵan alǵashqy jyldary tirkelgen. Mysaly 2020–2022 jyldary 111 buzýshylyq deregi resmı túrde tirkelse, sońǵy úsh jylda bul kórsetkish 38-ge deıin azaıǵan.
«Bul kórsetkish «Pedagog mártebesi týraly» zań talaptarynyń naqty iske asyrylyp jatqanyn aıqyndaıdy. Osy baǵyttaǵy jumystardy kúsheıtý maqsatynda komıtet jáne onyń aýmaqtyq departamentteri prokýratýra organdarymen birlese otyryp naqty faktilerge jedel áreket etetin bolady», dedi Serik Áshirov.
Mınıstrliktiń málimetinshe, saladaǵy zań buzýshylyqtardyń basym bóligi pedagogterdi kásibı mindetine jatpaıtyn jumystarǵa tartý, olardyń ar-namysyna tııý, konsert bıletterin satyp alýǵa nemese túrli is-sharalarǵa qatysýǵa májbúrleý sıpatynda órbıdi.
Sondaı-aq pedagogke qurmetsizdik tanytý, onyń ishinde áleýmettik jeliler men BAQ arqyly ar-namysyna nuqsan keltirý derekteri boıynsha oqýshylardyń ata-analaryna qatysty 12 ákimshilik is qozǵalǵan.
Eske salaıyq, «Pedagog mártebesi týraly» zańǵa 2019 jyldyń 27 jeltoqsanynda Prezıdent Qasym-Jomart Toqaev qol qoıǵan bolatyn.
Oqý-aǵartý mınıstri Juldyz Súleımenova «Egemen Qazaqstan» gazetiniń 4 qazanynda jarııalanǵan sanyndaǵy «Jańa dáýir pedagogi – qoǵamnyń basty aınasy» maqalasynda elimizde muǵalimderdiń quqyn qorǵaý máselesi nazardan tys qalmaıtynyn atap ótken bolatyn.
