Bıyl Mańǵystaýda ekonomıkalyq ósimniń negizgi kórsetkishteri oń dınamıka kórsetip otyr: ónerkásip óniminiń kólemi 2,9 trln teńgeden assa, ınvestısııalar kólemi 105,4%-ǵa ósip, 949,9 mlrd teńgeni qurady. Qurylys, transport, saýda, baılanys salalary da turaqty damý ústinde.
Sońǵy úsh jylda Mańǵystaýǵa 3 trln teńgege jýyq ınvestısııa tartylǵan. Tek bir jyldyń ózinde óńirge 3 mlrd AQSh dollarynan astam tikeleı sheteldik ınvestısııa quıyldy. Jalpy 2026-2032 jyldary quny 10 trln teńge bolatyn 55 joba júzege asyrylyp, 8,8 myń jumys orny ashylady. Bıyldyń ózinde 19 joba iske qosyldy.
Mańǵystaý týrızm salasynda da joǵary kórsetkishke ıe bolyp otyr. О́ńir sheteldik týrısterdi qabyldaý boıynsha elimizde TOP-3 quramyna endi. 2025 jyldyń 9 aıynda óńirge 350 myńnan astam týrıst kelip, 17,2 mlrd teńgeniń qyzmeti kórsetildi. Týrızmdi damytý maqsatynda Mańǵystaý, Shetpe jáne Beıneý temirjol vokzaldary qaıta jańǵyrtylyp jatyr. Kendirli áýejaıynyń qurylysy bastaldy. 2025-2029 jyldary jalpy quny 198 mlrd teńgege 17 týrıstik jobany iske asyrý josparlanǵan.
Agroónerkásiptik keshende de oń ózgeris baıqalady. Bıyl 38 mlrd teńgeniń ónimi óndirildi. Mańǵystaý túıe sharýashylyǵy boıynsha elde kósh bastap tur: óńirde 95 myńǵa jýyq túıe bar. Prezıdent tapsyrmasyna sáıkes, túıe sútin tereń óńdep, eksportqa baǵyttaý boıynsha úsh iri joba iske asyp jatyr. Budan bólek Kaspıı teńizinde balyq aýlaý jáne ósirý boıynsha sheteldik ınvestorlar tartylyp, 2027 jylǵa deıin tórt iri akvakýltýra jobasy iske qosylady. Sonyń ishinde «Organic Fish» jobasy jylyna 5000 tonnaǵa deıin albyrt ósirýge múmkindik beredi.
Shaǵyn jáne orta bıznes óńir ekonomıkasynyń negizgi tirekteriniń biri retinde 40%-dyq úleske ıe. Sońǵy 11 aıda bıznes sýbektileri 1 trln teńgeniń ónimin shyǵardy. Infraqurylym salasynda jergilikti mańyzy bar avtojoldardyń 97%-y jaqsy kúıde. О́ńir tranzıttik tasymaldyń mańyzdy núktesi retinde júk aınalymyn arttyryp otyr.
Bilim berý salasynda da oń ózgerister kóp. Bıyl Mańǵystaý oblysynda «Keleshek mektepteri» ulttyq jobasy aıasynda 13, demeýshilik esebinen 1 mektep ashyldy. Sondaı-aq Memleket basshysynyń tapsyrmasyna sáıkes sportta daryndy balalarǵa arnalǵan 300-ge jýyq jas sportshyǵa bilim beretin mektep-ınternat kolledji paıdalanýǵa berildi.
Bıyl óńirde 6 myńnan astam mádenı is-shara uıymdastyryldy. 2025 jyly Aqtaý qalasy Túrki áleminiń mádenı astanasy boldy. Bul joba halyqaralyq deńgeıde elimizdiń týrıstik jáne mádenı áleýetin damytýǵa septigin tıgizdi. Joba aıasynda birqatar mádenı, tarıhı-ǵylymı jáne sporttyq sharalar ótkizildi. Qarasha aıynda «Aqtaý-Túrki áleminiń mádenı astanasy» jylynyń saltanatty jabylý rásimi ótti.
