Foto: azattyq.org
Adam ómirin jalmaǵan qyzyl jalyn
Bıyl 4 maýsym kúni Batys Qazaqstan oblysy Syrym aýdany Jympıty aýylynda jekemenshik turǵyn úıde órt shyǵyp, 5 bala kóz jumdy. Oblystyq tótenshe jaǵdaılar departamentiniń málimetinshe, qyzyl jalyn shamamen 30 sharshy metr aýmaqty qamtyp, úı ishindegi turmystyq zattar men jıhazdar órtke oranǵan. Oqıǵa ornyna jetken órt sóndirý qyzmeti úıden es-tússiz jatqan bes balany alyp shyǵyp, jedel aýrýhanaǵa jetkizgenmen búldirshinderdi aman alyp qalý múmkin bolmaǵan. Qaıtys bolǵan balalardyń eń úlkeni – 6, eń kishisi – 3 jasta bolǵan. Olar 2019, 2020, 2021, 2022 jáne 2023 jyly týǵan. Al aýdan ákimdigi taratqan aqparatqa sáıkes, otbasy bul úıdi jalǵa alyp turǵan.
9 qazan kúni Pavlodar oblysyndaǵy sharýa qojalyǵynda órt shyǵyp, qyzyl jalyn 6 adamnyń ómirin jalmady. О́rt óńirdegi Solnechnyı kentinen 7 km qashyqtyqta ornalasqan sharýa qojalyqtarynyń birinde bolǵan. Sharýa qojalyqqa qutqarýshylar kelgende turǵyn úı tolyǵymen órtke oranǵanyn kórgen. О́rttiń saldarynan shatyr jartylaı qulap, órt irgeles qurylystarǵa da taralyp, jalpy aýdany 920 sharshy metrge jaıylǵan. О́rt kezinde úıde 7 adam bolǵan. Olardyń biri 1972 jyly týǵan er adam óz betinshe syrtqa shyǵyp úlgergen. Qalǵan 6 adam oqıǵa ornynda jan tapsyrǵan.
18 qarasha Túrkistan oblysy Jetisaı aýdany Alǵabas aýylynda bir áýlıettiń 12 múshesi órt saldarynan qaza tapty. Onyń ishinde toǵyzy – kámeletke tolmaǵan bala. Olar 2009, 2010, 2012, 2015, 2017, 2019, 2021 jáne 2024 jyly dúnıege kelgen. О́rtenip jatqan úıden óz kúshimen shyqqan 1986 jyly týǵan er adamnyń denesiniń 12%-y kúıgen, onyń jaǵdaıy aýyr dep baǵalanǵan. 1991 jyly jáne 2018 jyly týǵan taǵy eki adamnyń denesiniń tıisinshe – 30%-y, 11%-y kúıgen edi. Sol ýaqytta olar aýrýhananyń jansaqtaý bólimine jatqyzylyp, jasandy tynys alý apparatyna qosylǵan bolatyn. Dese de dárigerlerdiń jan-jaqty júrgizgen medısınalyq kómegine qaramastan 2018 jyly týǵan qyz aýrýhanada baqılyq boldy.
Búgin Astanada «Dıplomat» turǵyn úı kesheniniń janynda meıramhana órtendi
Bazar men saýda jelilerindegi órt oqıǵalary
Osy jyly el óńirleri men Astana, Almaty qalalarynda birneshe bazar men saýda jelilerinen órt shyqty.
Aqpan aıynda Astanadaǵy «Saryarka» saýda ortalyǵyna japsarlas salynǵan 2 qabatty ǵımarattan órt shyqty. О́rtti sóndirýge 10 tehnıka men 50 adam jumyldyryldy. Qyzyl jalyn 100 m² aýmaqty qamtydy. Tótenshe jaǵdaıdan eshkim zardap shekken joq.
18 shilde kúni elordadaǵy «Alash Highway» bazarynda iri órt tirkeldi. О́rt sóndirý qyzmetine kesh habarlanǵandyqtan qyzyl jalyndy sóndirý jumystary kúrdeli ótip, 100-den asa órt sóndirýshi jáne 60 tehnıka jumyldyryldy. Mamandar órttiń ózge de aýmaqqa taralýyna jol bermedi. Zardap shekkender anyqtalmady.
Astanada halyq qarasy úzilmeıtin «Asem» bazarynda 6 qarasha kúni órt shyqty. Abyroı bolǵanda atalǵan tótenshe jaǵdaı kezinde kelýshiler men saýdagerler zardap shekken joq.
18-shi qarashadan 19-shy qarashaǵa qaraǵan túni Astanadaǵy «Big Shanhaı» bazarynda da alapat órt boldy. Oqıǵa ornyna alǵashqy bólimsheler jetkende órt órship, qabataralyq jabyn ishinara qulaǵan. Qutqarýshylar órt qarqynynyń joǵary bolǵanyn, qatty tútin de ony sóndirýde birshama qıyndyq týǵyzǵanyn atap ótken. Bazar ákimshiligi órt týraly habarlamaǵan. О́rtti birinshi jáne úshinshi qabattyń terezelerinen shyqqan qoıý qara tútindi baıqap qalǵan órt sóndirý bóliminiń qyzmetkerleri ózderi anyqtaǵan. О́rtti sóndirýge TJD jáne jergilikti atqarýshy organnyń 165 qyzmetkeri jáne shamamen 62 birlik tehnıkasy jumyldyrylǵan.
28 maýsym kúni О́skemendegi jergilikti turǵyndar arasynda «Ońtústik bazar» atalyp ketken saýda qatarlarynan da órt shyqty. О́rt áýeli jastyqtar saqtalatyn qoımada tutanǵan. О́rttiń tez taralý qaýpi basym bolǵanmen, mamandardyń jedel áreketiniń arqasynda qyzyl jalyn der ýaqytynda aýyzdyqtaldy.
11 tamyz kúni Almatydaǵy Soltústik aınalym kóshesindegi bazar aýmaǵynda tańǵy ýaqytta órt tutanǵan. Qyzyl jalyn 70 m² aýmaqty sharpyǵan. Keıinnen órttiń bazar mańyndaǵy konteınerler men ashanadan shyqqany anyqtaldy.
Qoqys polıgonyndaǵy órtke baılanysty tótenshe jaǵdaı jarııalandy
15 qyrkúıek kúni Almatydan 35 shaqyrym jerde ornalasqan Alataý qalasyndaǵy qoqys polıgonynan órt shyqty. Alapat órt 1 aptaǵa sozylyp, mamandar órtti 7 kúnnen keıin ǵana oqshaýlaı aldy. Qalada osy órtke baılanysty tehnogendik sıpattaǵy tótenshe jaǵdaı jarııalandy. О́rt 10 gektar aýmaqty sharpyǵan. О́rtti sóndirýge Almaty oblysy Tótenshe jaǵdaılar departamenti, Almaty qalasy, Shymkent qalasy, Qaraǵandy, Jambyl, Túrkistan oblystarynyń, Abaı jáne Jetisý oblystarynyń tótenshe jaǵdaılar departamentteriniń kúshteri men quraldary, № 28237, 52859 jáne 68303 áskerı bólimderi, sondaı-aq TJM «Qazseldenqorǵaý» MM mamandary jumyldyrylǵan.
