Teńiz bıatlonynda ekinshi oryn aldy

«Kaspıı teńizi – 2015» alǵashqy halyqaralyq baıqaýy márege jetti. «Saryarqa» qazaqstandyq zymyran-artıllerııalyq korabliniń ekıpajy saıysta ekinshi oryn aldy. Birinshi oryndy «Grad Svııajsk» shaǵyn artıllerııalyq korablindegi Reseı áýe-teńiz kúshteri áskerı teńizshileri ıelense, úshinshi oryn Ázerbaıjan áskerı-teńiz kúshteri «G-124» sý ústi korabliniń ekıpajyna buıyrdy, dep habarlady Qorǵanys mınıstrliginiń baspasóz qyzmeti. Jerebege sáıkes bizdiń koman­damyzǵa baıqaýdyń árbir synaǵyn bastaý kúrdeli tapsyrmasy tıdi. Alaıda, birinshi bolyp óner kórsetip, teńizshilerimiz qalǵan komandalarǵa jaqsy deńgeı jáne qarqyn berdi, sondaı-aq, saıys boıy kóshbasshylyq pozısııalardyń birin ustap turdy. Olar korabldi basqarý, halyqaralyq júıege sáıkes jaryq berý belgilerin qabyldaý jáne taratý, áýe, teńiz jáne sý ústi nysanalary boıynsha oq atý, apatqa ushyraǵan korabldi jáne borttyń ar jaǵynda qalyp qoıǵan jolaýshylardy qutqarýda sheberlikterin kórsetti. Qazaqstan áskerı-teńiz kúsh­teriniń teńizshileri olar­dyń alǵashqy tájirıbesi – halyq­ara­lyq saıysta sátti óner kórsetip, ózderiniń jaýyngerlik ázirligin rastady. 13 tamyzda «Kas­pıı teńizi – 2015» baıqaýy­nyń je­ńim­­pazdaryn marapattaý saltanatty rásimi ótedi. Al odan keıin korablderimiz teńizge shy­ǵyp, qazaqstandyq jaǵalaýǵa bet alatyn bolady. «Egemen-aqparat».