21 jeltoqsanda Kókpekti aýdanynda ótken aýdan ákimin saılaý qorytyndysynda Nurbek Qoshqarbaev 70,8 daýys jınap, jeńiske jetti.
Oblys ákimi Berik Ýálı búgin ony aýdan aktıvine tanystyrdy.
Bıyldan bastap «Saılaý týraly» zańǵa sáıkes oblystyq mańyzy bar qala, aýdan ákimderin halyq ózi, tikeleı daýys berý arqyly saılaı alady. 2023 jyly pılottyq rejımde óńirimizde Kýrchatov qalasy men Abaı aýdanynyń ákimi, bıyl 27 shildede oblysymyzda alǵashqylardyń biri bolyp Jańasemeı aýdanynyń ákimi tikeleı daýys berý arqyly saılanǵan bolatyn. 12 qazanda Semeı qalasynyń ákimi saılandy. Bul – elimizdiń tarıhynda alǵash ret ótken oblys ortalyǵy ákiminiń saılaýy.
Jıyn barysynda Kókpekti aýdanynyń aýmaqtyq saılaý komıssııasynyń tóraǵasy Erasyl Orazhanov Nurbek Qoshqarbaevqa ákim kýáligin tapsyrdy.
«Nurbek Tursynqanuly – memlekettik qyzmettegi tájirıbesi mol, bilikti basshy. Osy aýdannyń týmasy. Kókpekti – halqy eńbekqor, aýyl sharýashylyǵy salasynda áleýeti zor aýdan. О́ziniń erekshelikteri men qordalanyp qalǵan máseleleri de jeterlik. Halqymyzda «Týǵan jerge týyńdy tik» degen jaqsy sóz bar. О́z týǵan jerińe qyzmet etý – úlken senim, zor jaýapkershilik. Sondyqtan Nurbek Tursynqanuly Kókpekti aýdanynyń áleýmettik-ekonomıkalyq damýyna, ınfraqurylymynyń jaqsarýy men kórkeıýine barlyq kúsh-jigerińizdi salasyz dep senemin», dedi oblys ákimi.
Nurbek Tursynqanuly Kókpekti aýdany, Kókpekti aýylynda dúnıege kelgen. Eńbek jolyn Semeı qalasyndaǵy №33 orta mekteptiń bastaýysh synyptaryndaǵy orys tili pániniń muǵalimi bolyp bastaǵan. Ár jyldary Semeı qalasynyń bilim bóliminde, Semeı qalasy ákiminiń apparatynda bas maman, bas ınspektor, bólim basshysy, Kýrchatov qalasy ákimi apparatynyń basshysy, qala ákiminiń orynbasary qyzmetterin atqardy. 2024 jyldyń 23 jeltoqsanynan bastap osy ýaqytqa deıin Abaı oblysy Besqaraǵaı aýdanynyń ákimi bolyp qyzmet atqardy.
