Memorıaldy taqta Almaty qalalyq ákimdiginiń qoldaýymen jasalyp, qalamgerdiń qazaq ádebıeti men ǵylymyna qosqan ólsheýsiz eńbegine qurmet retinde ashyldy. Taqtany ashý rásimine qatysqan zııaly qaýym ókilderi Orazanbaı Egeýbaevtyń parasaty men ult rýhanııatyndaǵy tulǵalyq ornyn aıryqsha atap ótti.
M.Áýezov atyndaǵy Ádebıet jáne óner ınstıtýtynyń uıymdastyrýymen jáne Jazýshylar odaǵynyń qoldaýymen ótken konferensııaǵa aıtýly ǵalymdar, jazýshylar, Orazanbaı Jumaǵululynyń týystary qatysty. Is-sharany M.Áýezov atyndaǵy Ádebıet jáne óner ınstıtýtynyń dırektory, akademık Kenjehan Matyjanov júrgizip, Orazanbaı Egeýbaevtyń qazaq ádebıeti men folkloryn zertteý isine qosqan ólsheýsiz úlesin, sheteldegi qazaq murasyn júıeleýdegi qaıratkerlik qyzmetine keńinen toqtaldy.
Jıyn barysynda shetel qazaqtarynyń rýhanı murasyn zertteýdiń ózekti máseleleri jańa qyrynan qarastyrylyp, jazýshynyń ǵylymı murasynyń mańyzy taldandy. Sonyń negizinde qazaq ádebıetiniń tarıhy, shetel qazaqtarynyń muralary, tańjaryqtaný jáne Orazanbaı Egeýbaevtyń ǵylymı murasy jóninde mazmundy baıandamalar men estelikter tyńdaldy.
Atap aıtqanda, aqyn Svetqalı Nurjan «Ult taǵdyryn tuǵyrlaǵan tulǵa», Jazýshylar odaǵy tóraǵasynyń orynbasary Ǵalym Qalıbekuly – «Qazaq ádebıetindegi ulttyq qaharmandar», fılologııa ǵylymdarynyń doktory Gúljahan Orda – «Kókbóri nemese taǵdyr tálkegi» roman-essesindegi ult qasireti», fılologııa ǵylymdarynyń kandıdaty Aqedil Toıshanuly – «Tańjaryqtanýdyń negizin qalaýshy», fılologııa ǵylymdarynyń kandıdaty Jumashaı Raqysh – «Halyq murasynyń janashyry», jazýshynyń uly Aıdyn Egeýbaev – «Áke týraly sóz» taqyrybynda baıandama jasady. Sondaı-aq tarıhshy Álimǵazy Dáýlethan, aqyn Erbol Alshynbaı, memleket jáne qoǵam qaıratkeri Talǵat Mamashev jazýshy murasynyń búgingi ádebıettaný men rýhanııattaǵy orny týraly pikir bildirdi.
Konferensııa aıasynda jazýshy Sálı Sadýaqasulynyń Orazanbaı Jumaǵululyna arnalǵan «Qaıran, Orekem-aı» atty jańa kitabynyń tusaýkeseri ótti.
«Bul kitap – mereıtoı ıesiniń tulǵalyq bolmysyn, adamı qasıetin, shyǵarmashylyq jáne ǵylymı jolyn jan-jaqty ashatyn estelik-esse janryndaǵy qundy týyndy. Avtor onda Orazanbaı Egeýbaevtyń Qytaıdaǵy qazaq ádebıetin zertteý saparlaryndaǵy izdenisterin, arhıvter men qoljazbalar arasyndaǵy tynymsyz eńbegin, sondaı-aq tańjaryqtaný baǵytyn qalyptastyrýdaǵy rólin keńinen baıandaıdy. Mereıtoıǵa arnalǵan ǵylymı-teorııalyq konferensııa men mereıtoı aıasynda júzege asqan is-sharalar jazýshynyń ulttyq rýhanııattaǵy ornyn jan-jaqty aıqyndap, onyń sheteldegi qazaqtardyń ádebı jáne folklorlyq murasyn jınaýdaǵy, jarııalaýdaǵy jáne ǵylymı aınalymǵa engizýdegi ólsheýsiz eńbegin keń kólemde tanytty», deıdi Ádebıet jáne óner ınstıtýtynyń baspasóz hatshysy Nur Maǵazbekov.
ALMATY
