Ahýal ortalyǵy arqyly kúzet bólimsheleriniń qyzmeti, merdiger uıymdarǵa tıesili tehnıkanyń qozǵalysy GPS pen vıdeotelematıka kómegimen, sondaı-aq 45 baqylaý-ótkizý pýnktiniń jumysy úzdiksiz qadaǵalanady. Biryńǵaı júıege metallýrgııalyq kombınat aýmaǵyndaǵy 15 baqylaý aımaǵyna ornalastyrylǵan 400-den astam beınebaqylaý kamerasy biriktirilgen.
– Bul ortalyq kombınat aýmaǵyndaǵy barlyq logıstıkalyq úderister men jalpy ahýaldy naqty ýaqyt rejıminde baqylaýǵa múmkindik beredi. Ortalyqtyń úzdiksiz jumysyn ár aýysymda 15 beınebaqylaý operatory jáne bir úılestirýshi maman qamtamasyz etedi, – dedi Qarmet kompanııasynyń rejım jáne qaýipsizdik jónindegi dırektory Oljas Seıtahmetov.
Ahýal ortalyǵy jumysynyń basty ereksheligi – jasandy ıntellekt tehnologııalaryn engizý. Intellektýaldy júıeler yqtımal quqyqbuzýshylyqtardy avtomatty túrde anyqtap, oqıǵalardy saraptaıdy ári jedel ári naqty basqarýshylyq sheshimder qabyldaýǵa jol ashady. Barlyq tótenshe jaıttar mindetti túrde tirkelip, sıfrlyq saraptama qalyptastyrý arqyly qujattalady. Bul qaýipsizdik júıesin keshendi túrde taldap, prosesterdi úzdiksiz jetildirýge múmkindik beredi. Sonymen qatar kúzet qurylymdary paıdalanatyn ushqyshsyz ushý apparattarynyń áýeden baqylaý ushýlary da osy ortalyq arqyly baqylanady.
Kompanııa aldaǵy kezeńde beınebaqylaý aımaqtaryn keńeıtip, qosymsha 4 myńnan astam kamera ornatýdy josparlap otyr. Ahýal ortalyǵynyń iske qosylýy Qarmet úshin sıfrlandyrýdy tereńdetý men óndiristik qaýipsizdik deńgeıin sapalyq jańa kezeńge kóterýdegi mańyzdy qadam sanalady.
