Aýmaǵy 1200 gektarǵa jetetin alyp keshenniń jyldyq qýaty 1 gıgavatt. Injenerler teńiz betine 3 myńǵa jýyq fotoelektrli paneldik modýl ornatqan. Nátıjesinde energııa óndirý tıimdiligi birneshe ese artqan.
Bir qaraǵanda, sý ústine panel ornatý tehnıkalyq turǵydan tym kúrdeli sharýa sekildi. О́ıtkeni teńiz – turaqsyz orta, ıaǵnı tolqyn, tuzdy sý, jel, taıfýn qaýpi, korrozııa, qaýipsizdik máselesi bar. Biraq dál osy «qıyndyq» Qytaı ınjenerlerin jańa sheshim tabýǵa jetelegendeı. Qurylys kezinde joıqyn taıfýndarǵa tótep beretin arnaıy tásil qoldanylǵan. Al teńiz sýy panelderdi tabıǵı túrde salqyndatyp, shamadan tys qyzýdan qorǵaıdy.
Sońǵy jyldary álemniń kóptegen elinde kún energetıkasy qarqyndy damyp keledi. Degenmen kún panelderin keń kólemde ornalastyrý úshin úlken aýmaq qajet. Qala mańynda jer baǵasy qymbat, aýyl sharýashylyǵy alqabyn qysqartý da ońaı sheshim emes. Osy tusta sý beti – buryn nazardan tys qalyp kelgen «keńistik». Qytaıdyń teńizdegi stansııasy bul baǵyttyń endi tek tájirıbe emes, iri óndiristik deńgeıge ótkenin ańǵartady.
Jobanyń ereksheligi – teńiz ústindegi ınjenerlik qurylymnyń tózimdiligi men tıimdiligi qatar oılastyrylǵany. Teńizde paneldi jaı ǵana qalqytyp qoıý jetkiliksiz. Ár bólshek jel júktemesine, tolqyn soqqysyna, tuzdy ortaǵa shydaýy kerek. Sondyqtan mundaı nysan – bir mezette energetıka, keme jasaý, qurylys jáne materıaltanýdyń toǵysqan tusy.
«Sý túbindegi qadalar ınnovasııalyq tehnologııamen ornatyldy. Fotoelektrli panelderdiń eni 35, uzyndyǵy 60 metr bolady. Biz olardy 15 gradýs qıǵash ornattyq. Bul tásil joıqyn teńiz daýyldaryna tótep berý úshin jasaldy. Sondaı-aq qańqasyna jumsalatyn bolat temirdi 10 paıyzǵa deıin únemdeýge múmkindik berdi. Dál osy tájirıbe endigi jobalarda jappaı qoldanylady», dedi Kún elektr stansııasy basshysynyń orynbasary Chjan Bo.
