Aqtóbede eki soǵys ardageriniń úıine jóndeý júrgizildi

AQTО́BE. 12 mamyr. Aqtóbe ferroqorytpa zaýyty Jeńistiń 70 jyldyǵyna oraı ardagerlerge qurmet kórsetti. «Qazhrom» transulttyq kompanııasy» AQ-nyń fılıaly bolyp sanalatyn kásiporyn arnaıy 2 mıllıon 600 myń teńge bólip, Uly Otan soǵysy ardagerleriniń úılerin jóndep berdi. Bul týraly egemen.kz habarlady. Búgingi tańda Aqtóbe ferroqorytpa zaýytynyń ardagerler keńesinde 687 qarııa esepte tur. Onyń tórteýi Uly Otan soǵysynyń ardagerleri, úsh adam osy mártebege teńestirilgender, 130-y tyl eńbekkerleri jáne 7-i soǵysta qaza tapqandardyń jesirleri. Ardagerler árdaıym zaýyt ákimshiliginiń basty nazarynda. Olardyń talap-tilekteri, ótinishteri qashan da sheshimin tabady. Bıyl Uly Jeńistiń 70 jyldyǵy qarsańynda zaýyt ákimshiligi soǵys ardageleriniń páteri men úılerin jóndeý jumystaryn oıdaǵydaı aıaqtap, mereke aldynda úlken qýanysh syılady. «Ardagerlerge qurmet kórsetý – bizdiń azamattyq paryzymyz. Biz tek Jeńis kúninde ǵana emes, olarǵa árdaıym qamqor bolyp, talap-tilekterin, ótinishterin qanaǵattandyryp otyramyz. Bıyl da osy ıgi dástúr óz jalǵasyn taýyp, ardagerimiz Nıkolaı Pashenkonyń (sýrette) ótinishi boıynsha onyń páterine jóndeý jumystary júrgizildi. Oblys ákimdiginiń tapsyrmasyna sáıkes qala turǵyny, soǵys ardageri О́tesh Jalmaǵambettiń de úıiniń shatyry almastyrylyp, ishi jóndeldi jáne syrty zaman talabyna saı materıaldarmen qaptaldy», – deıdi kásipodaq uıymynyń tóraǵasy Baqytkereı Kavanov. Sondaı-aq, onyń aıtýynsha, zaýyttyń 4 soǵys ardagerine 70 000 teńge kóleminde aqshalaı syılyq jáne azyq-túlik salynǵan qaltalar, osy mártebege teńestirilgen 3 ardagerge 50 000 teńge, 130 tyl eńbekkerine 26 600 teńge, 7 soǵysta qaza tapqandardyń jesirlerine 20 000 teńge jáne 27 aýǵan soǵysynyń ınternasıonal jaýyngerleri men Chernobyl apatynyn saldaryn joıýǵa qatysqandarǵa 17 800 teńge kóleminde aqshalaı syılyq jasaldy. Shara sońynda ardagerler merekege oraı jaıylǵan dastarhannan dám tatty. Budan bólek, qaladaǵy «Evrazııa» medısınalyq ortalyǵynda ardagerlerge tegin qyzmet kórsetý múmkindikteri qarastyryldy. Satybaldy Sáýirbaı. Derek, sýret: egemen.kz.