Qazir qalaǵa kiretin kólikter sany kóbeıgen. Bul kópirmen qala aýmaǵyna kiretin otandyq, sheteldik aýyr júk kólikteri, avtobýstar júrýge tıis edi. «Kerýen» kóshesimen júrip jatqan kólikter tar jolda keptelip, ýaqyttaryn joǵaltyp jatady. Onyń ústine qazirgi kópir eski, ylǵı jóndeý qajet bolyp jıi jabylyp qalady. Munyń ózi «Jumysshy» kentinde turatyn nemese ol jaqqa bir sharýamen baratyn turǵyndarǵa da qıynshylyq týǵyzyp, mashınalar tizbeginen óte almaı, áýrege túsedi. Endi jańa kópir salynsa, osy tyǵyryqtan shyǵarmyz dep qala turǵyndary máz bolyp qalǵan edi, alaıda toǵyz aıda bitedi degen kópirdiń aıaqtalý merzimi úsh jylǵa sozylyp ketti. Áýeli 2024 jylǵy shildeden kólikter júre bastaıdy degen ýáde bolǵan, endi tek 2026 jyldyń jazynda aıaqtalady dep otyr.
Jalǵyz bul emes, túrik kompanııasy júrgizip jatqan kópbeıindi aýrýhananyń qurylysy da paıdalanýǵa berilý merziminen qashyqtap ketti. Qazaq drama teatrynyń qurylysy da solaı sozylyp, áıteýir aıaqtalmaǵan kúıinde tapsyrylyp, qurylys jumystary teatrdyń óz jumysymen qosarlana júrgizilip, áreń aıaqtalǵan. Sondyqtan qurylys salasyn baqylaýshylar men arhıtektorlar qyzmetterine kim kóringendi qoıa salmaı, mamandardy muqııat tańdaǵan durys-aý.
Árıne, Petropavl men onyń mańaıyn eki jyl qatarynan sý basyp, eldiń nazary kóbine tasqynmen kúreske aýdy. Myńdaǵan jańa úı salyndy. Zardap shekkenderdiń birazyna jańa úı satylyp alyndy. Alaıda onyń shyǵynyna kópirge bólingen qarajat jumsalǵan joq, arnaıy qorlardan, memlekettik kómekten kelgeni jarııalanǵan.
Jańa kópirdiń uzyndyǵy – 1100 metr. Ol qalaǵa engen kólikterdi «Ýnıversalnyı» kóshesine alyp barady. Bul jaqta turǵyn úıler joq, negizinen óndiris kásiporyndary ornalasqan. Sondyqtan turǵyndar mashına gúrilinen qoryqpasa da bolady.
Qurylys jumystaryn áýelde kókshetaýlyq «Býka» JShS bastaǵan. Alaıda ol jumysty ári qaraı júrgize almaǵan soń, ákimdik kelisimshartty buzyp, jańa merdiger tapqan. «Qurylys-Servıs SQ» JShS dep atalatyn bul kompanııa ázirge jumysqa jiti kirisip jatyr. Qurylystyń 80 paıyzy aıaqtalǵan. Jýyrda oblys ákimi barlyq tıisti basshylarmen qurylys basynda bolǵanda kompanııa basshysy Murat Harsıev: «Búginge deıin kóp jumystar isteldi. Tek trotýardy aıaqtap, betondap, jaryq tartyp, sýaǵar jasaý sııaqty qosalqy jumys qalyp tur. Osyǵan deıin 30 tehnıka jumys istegen, qazir asa kóp tehnıkany jumyldyrýdyń qajeti joq. Qazir kópirdiń tómengi qurylysy qolǵa alyndy. Topyraqty jáne baǵandardy bekitý úshin 53 myń kirpish qaladyq, 32 myń tonnadaı qıyrshyqtas, jol polotnosyn jetkizdik», deıdi ol. Al «belgilengen mezgilde tapsyryla ma?» degen suraqqa merdiger «barynsha tyrysamyz» dep jaýap berdi. Kópir qurylysy aıaqtalsa, Petropavl qalasynyń turǵyndary úshin úlken olja bolar edi.
PETROPAVL
