«Syr qorǵany – sekseýil» jobasy – Aral óńirindegi sekseýil ekojúıesin qalpyna keltirýge jáne Ortalyq Azııadaǵy shóleıttenýge qarsy kúreske baǵyttalǵan eriktiler bastamasy.
Byltyr naýryz aıynda Almaty Management University eriktileri qurǵap qalǵan Aral teńiziniń tabanyna 5 100 sekseýil kóshetin otyrǵyzdy. Bul el tarıhynda stýdentterdiń, kásipkerlerdiń jáne halyqaralyq eriktilerdiń jappaı qatysýymen júzege asqan alǵashqy joba boldy. Buǵan deıin bul jumystar ondaǵan jyl boıy tek memlekettik orman sharýashylyqtary tarapynan atqarylyp keldi.
Bıyl «AlmaU» stýdentteri Araldy qutqarý halyqaralyq qory men «Freedom Bank» uıymdastyrǵan halyqaralyq ekologııalyq aksııaǵa qatysyp, 60 gektar aýmaqtaǵy 18 000 sekseýil kóshetiniń 8 000-yn otyrǵyzdy. Osylaısha, jobanyń eki jyldyq kezeńinde barlyǵy 13 100 sekseýil kósheti egildi. Bastamaǵa Ortalyq Azııa elderi men Eýropa jáne Amerıka Qurama Shtattarynan 160-tan astam qatysýshy tartyldy. Sóıtip, Almaty Management University Aral óńirin qalpyna keltirýge qoǵamdyq jáne korporatıvtik qatysýdyń jańa jolyn ashty.
Qazir «Syr qorǵany – sekseýil» jobasy sekseýil ormanyn qalpyna keltirýge baǵyttalǵan turaqty qoǵamdyq-korporatıvtik qozǵalysqa aınaldy. Jobanyń biregeıligi ýnıversıtettiń «living lab» modelin qoldanyp, ol dalalyq ekologııalyq jumysty, ǵylymı tásildi, bilim berý modýlderin jáne eriktilerdi biriktirdi. Sekseýildi tabıǵı tosqaýyl retinde paıdalaný shóleıttenýge qarsy kúres jónindegi BUU konvensııasynyń usynymyna sáıkes keledi jáne klımattyq beıimdelý men Aral óńirindegi shańdy daýyldy azaıtý jónindegi jahandyq kún tártibine úles qosady.
«AlmaU» ekologııalyq kóshbasshylarynyń jańa býynyn qalyptastyra otyryp, Ortalyq Azııa ýnıversıtetteriniń jahandyq mańyzy bar ekologııalyq daǵdarystardy sheshýine atsalyspaqshy.
ALMATY
