Sarapshylardyń pikirinshe, bul kólemdegi avtokólikterdiń jappaı Reseıden Qazaqstan naryǵyna jetkizilýin kútýge negiz joq. Mamandardyń esebinshe, Qazaqstanǵa buryn aıdalǵan kólikterdiń tek 20 paıyzdan astamy keledi.
«Máselen, naryqta avtokóliktiń baǵasy 10 mln teńge delik. Eger olar ony 40 paıyz jeńildikpen usynsa, tutynýshy, árıne, baryp satyp alýy múmkin, biraq bul jaǵdaıda qosylǵan qun salyǵyn tóleýge týra keledi. QQS mólsheri de artady. Sondyqtan bári baǵanyń qanshalyqty tartymdy bolýyna baılanysty. Degenmen lızıng berýshiler kólikti ózderine zııan keltiretindeı tym arzan baǵamen sata qoıady dep oılamaımyn», deıdi «Jalpy jol» jol qozǵalysy qaýipsizdigi qaýymdastyǵy» qoǵamdyq birlestiginiń prezıdenti Arsen Shakýov.
Avtokólikterdiń negizgi bóligin reseılik tutynýshylar satyp alýy yqtımal. Sebebi Reseıdiń óz ishinde bul mashınalar qosymsha shyǵynsyz, ıaǵnı qosylǵan qun salyǵy men kedendik bajsyz, aıtarlyqtaı arzanǵa túsedi.
Sonymen qatar 2026 jyly Reseıdegi taksoparkter óz óndirisindegi avtokólikterge kóshýi tıis. Bul naryqqa 800 myńǵa deıin paıdalanylǵan sheteldik kóliktiń shyǵýyna ákelýi múmkin. Sarapshylardyń aıtýynsha, bul mashınalardyń bir bóligin taksı júrgizýshileriniń ózi satyp alady, al negizgi úlesin sońǵy birneshe jyl boıy avtokólik tapshylyǵyn sezinip otyrǵan Reseıdiń ishki naryǵy sińiredi.
«Bul avtokólikterdi ishki naryq ońaı qabyldaıdy dep oılaımyn ári suranys ta joǵary bolady. Sebebi taksı salasynda negizinen eki-úsh jyl ǵana paıdalanylǵan, asa eski emes kólikter qoldanylady. Bul – Reseı naryǵy úshin óte tartymdy segment. Sondyqtan olar nege bizge kelýi kerek? Qazaqstanda avtokólik tapshylyǵy joq, kerisinshe, jańa zaýyttar salynyp jatyr», deıdi avtocarapshy Alekseı Alekseev.
Degenmen bul avtokólikterdiń belgili bir bóligi Qazaqstan naryǵynda da paıda bolýy múmkin. Alaıda ýtıl alymy men kedendik baj salyǵyna baılanysty kólikterdi elge ákelý áli de qymbat bolyp otyr. Sol sebepti, mamandardyń aıtýynsha, Qazaqstanǵa tek jeke jetkizilimder, arnaıy tapsyrystar, sırek modelder nemese otandyq naryqta balamasy joq qozǵaltqyshy bar avtokólikter ákelinedi.
