QYZYLORDA. 12 mamyr. Qyzylorda oblysy Qarmaqshy aýdanynda Jeńistiń 70 jyldyǵyna arnalǵan Keńes Odaǵynyń batyry Táıimbet Kómekbaev atyndaǵy sambodan halyqaralyq memorıal aıaqtaldy. Bul týraly kyzylorda-news.kz habarlady.
Jarys Mádenıet jáne sport mınıstrligi, Qyzylorda oblysynyń dene shynyqtyrý jáne sport basqarmasy, Qarmaqshy aýdanynyń ákimdigi, T.Kómekbaev atyndaǵy qordyń uıymdastyrýymen ótti. Bıyl jıyrmasynshy ret týyn kótergen dúbirli dodaǵa AQSh, Armenııa, Ázirbaıjan, Belorýssııa, Bolgarııa, Grýzııa, Germanııa, Grekııa, Japonııa, Iran, Irlandııa, Izraıl, Latvııa, Lıtva, Mońǵolııa, Moldova, Ońtústik Koreıa, О́zbekstan, Reseı, Serbııa, Túrkııa, Tájikstan, Ulybrıtanııa, Qyrǵyzstan jáne Qazaqstannan 25 komanda qatysyp, 250-ge jýyq samboshy 9 salmaq dárejesinde synǵa tústi.
Jarystyń saltanatty ashylý rásiminde sóz alǵan oblys ákimi Qyrymbek Kósherbaev atalmysh týrnırdiń aımaq sportynyń damýyna ózindik úles qosyp otyrǵanyn erekshe atap ótti. Halyqaralyq sambo federasııasynyń sport dırektory Dmıtrıı Maksımov jarysqa qatysýshylardy quttyqtap, aımaq basshysyna Qazaqstandaǵy sambonyń damýyna qosqan zor úlesi úshin halyqaralyq sambo federasııasynyń alǵys hatyn tabystady.
Dúbirli básekede Qazaqstan sportshylary ózderiniń myqtylyqtaryn kórsetip, 5 salmaq dárejesinde chempıon atandy.
Aıta keteıik, 52 kılo salmaq dárejesinde óner kórsetken qarmaqshylyq Baýyrjan Raısov osy halyqaralyq memorıaldyń qatarynan on ekinshi márte jeńimpazy atanyp, jarys demeýshisi taǵaıyndaǵan jeńil avtokóliktiń kiltine ıe boldy. Sondaı-aq, halyqaralyq memorıaldyń «Úzdik sportshy» nomınasııasyn qaraǵandylyq Arman Sársenbın men reseılik Mıhaıl Polıanskov ıelendi.
Jarystyń ekinshi kúni 62 túıe palýan ortaǵa shyǵyp, qazaq kúresiniń kórigin qyzdyrdy. Bas júldege tigilgen «Toyota Prado» avtokóligin shyǵysqazaqstandyq Muhıt Tursynov qanjyǵalady. Ekinshi oryn alǵan qarmaqshylyq Elaman Erǵalıev pen úshinshi oryndy ıelengen Mońǵolııa palýany Altangerel Davanıamǵa temir tulpardyń kiltteri tabystaldy. Al tórtinshi oryndy enshilegen ózbekstandyq Odıl Týlendıbaev aqshalaı syıaqymen marapattaldy.
Erjan Baıtiles.
Derek: kyzylorda-news.kz.
Sýret: Jeńis Ysqabaı.
