Jańajyldyq kóńil kúı syılaıtyn úzdik fılmder

1. Home alone. (Úıde jalǵyz qalǵanda) 

Merekelik fılmder toptamasynyń kóshin osynaý klassıkaǵa aınalǵan amerıka kınosynan bastaýymyz kezdeısoqtyq emes ekeni túsinikti bolsa kerek. Birneshe býyn ókilderi úshin etene tanys fılmniń 3 bólimi túsirilgen. «Úıde jalǵyz qalǵanda» degen ataýmen qazaqshaǵa da tárjimalanǵan. 

Basty róldi somdaǵan Makoleı Kalkın bıyl 45 jasqa aıaq bassa da ár adamnyń kóńilinde qartaımaıtyn Kevın beınesi bar. Fılmde Kevın otbasylyq saıahattan qalyp qoıyp, aqylǵa negizdelgen aılasymen úıin urylardyń tonaýynan aman alyp qalady. Otbasylyq jyly qarym-qatynasty tereńdetip, batyl bolýǵa úndeıtin fılmdi jańa jyl demalystarynda taǵy bir ret tamashalańyz. Jańa oı túıerińiz sózsiz.

«Odın doma» fılminiń akterleri 30 jylda qalaı ózgerdi?

    2. The Polar Express. (Polıarly ekspress)

2004 jyly kórermen nazaryna usynylǵan anımasııalyq fılm. Fılm barysynda terezeden Soltústik polıýske bet alǵan jumbaq poıyzǵa ilesken balanyń bastan keshkenderi baıandalady. Ol merekege daıyndalyp jatqan Aıaz atany qarsy alý úshin ózge de balalarmen birlesip, tosyn oqıǵalarǵa tap bolady. Dostyq pen senim týyn jelbiretetin fılm sıýjeti sizdi de ǵajaıypqa sendiredi.

   3. Frozen. (Muzdy ólke) 

Áıgili Walt Disney Animation Studios usynǵan mýltfılm 3 bólimnen turady. Qazaq tiline «Muzdy ólke» ataýymen aýdarylǵan. Mýltfılmniń negizgi oqıǵasy qııaldan týǵan Erendell patshalyǵynda ótedi. Onyń sıýjetine erekshe qabileti bar Elza men batyl ári meıirimdi sińlisi Annanyń áreketteri arqaý bolady. Bir kúni Elzanyń qabileti eriksiz ashylyp, patshalyqty máńgilik qysqa aınaldyrady. Apaly-sińliler patshalyqty qalypty kúıine qaıtara ala ma? Osy bir kúrdeli jolda olarǵa qandaı keıipkerler kómektesedi? Mahabbat qylyn shertip, baýyrmaldyqqa bastaıtyn mýlt hıkaıany mindetti túrde balalaryńyzben birge tamashalańyz! 

Kıno álemindegi jetistikter

   4. A Christmas Carol

Aǵylshyn jazýshysy Charlz Dıkkenstiń prozasy negizinde ekranızasııalanǵan rojdestvolyq hıkaıa. Keń taralǵan nusqasy 2009 jyly usynylǵan. Onda sarań ári qatygez jańa jyldy jany súımeıtin Ebenezer Skrýdj qarııaǵa jańa jyl kúni rýhtar kelip, qatqyl minezin jumsartyp, ómirin qaıta qurýdy usynady. Ebenezer Skrýdj rýhtardyń usynysyn qabyl ala ma? 

Aıta keteıik, atalǵan proza jelisimen 1992 jyly «Rojdestvenskaıa skazka Mappetov», «Dýhı Rojdestva» (1999), «Skrýdj: Rojdestvo opıat» (2022) syndy birneshe nusqada fılm taspalanǵan. 

   5. Erkebaı 

Otandyq otbasylyq komedııa. Kınokartına jelisinde baı balasy Erkebaıdyń basynan ótken shytyrman oqıǵalary baıandalady. Aqshaǵa qyzyqqan qaraqshylar balany urlap ketedi. Fılmdegi eń qyzyqty oqıǵalar dál osy kezden bastaý alady. Otbasy Erkebaıdy aman-esen qutqara ala ma? 2024 jyly kórermen nazaryna usynylǵan fılm kópshiliktiń kóńilinen shyqty. Basty róldi «Kúldir-búldir» hıkaıalary arqyly tanylǵan Rasýl Baýyrjan somdaıdy.  

Qazaq kınosynyń jarqyn belesi

  6. Shelkýnchık

Nemis jazýshysy E.Gofmannyń ertegisi men Chaıkovskııdiń baletine negizdelgen Tatıana Ilına túsirgen reseılik tolyqmetrajdy anımasııalyq fılm. Keńes kezeńinde túsirilgen nusqadan bastap, ár jyldary jańaryp usynylǵan nusqalary álem jurtynyń nazarynan tys qalmaǵan. Mýltfılm jelisi boıynsha Marı esimdi qyz shyrshanyń túbin tazalap júrip, jańǵaq tárizdi oıynshyq taýyp alady. Shelkýnchıkke jan bitip, basty keıipkerge óziniń tyshqan patshalyǵyndaǵy basynan keshken qaıǵyly oqıǵalaryn baıandap beredi. Sol sátte Marı men Shelkýnchıkke tosyn daýys estiledi. Bul daýys olardyń tynys-tirshiligine qalaı áser etedi? О́zara kómek pen baýyrmaldyqqa bastaıtyn bul mýlfılmdi de balalarmen birge kórýge usynamyz.   

   7. Elf

Fentezı, meledrama, komedııa úılesken balalarǵa arnalǵan fılm. 2003 jyly jaryqqa shyqqan amerıkalyq fılm. Bala kezinde Santa Klaýstyń syılyq qapshyǵyna kezdeısoq túsip ketken Baddı Soltústik polıýste elfterdiń arasynda ósedi. Biraq ol basqa elfterden áldeqaıda uzyn ári ıkemsiz bolady. Ol óziniń shyn máninde adam ekenin bilgen soń, Nıý-Iorkke baryp, týǵan ákesin tabýǵa sheshim qabyldaıdy. Qala ómirine beıimdele almaı, talaı kúlkili jaǵdaılarǵa tap bolady. Degenmen onyń aqkóńil minezi men Rojdestvoǵa degen senimi aınalasyndaǵy adamdardyń júregin jylytyp, merekelik rýhty qaıta oıatady.

foto: Warner Bros

  8. «Ironııa sýdby, ılı s lıogkım parom» (Taǵdyr tálkegi)

1975 jyly taspalanǵan. Aldyńǵy tolqynnyń jańa jyl dese, aldymen oıyna oralatyn fılm. Kıno týyndy kezdeısoq ǵajaıyptarǵa, mahabbatqa senýge, qurmetpen qaraýǵa shaqyrady.