Foto: iStock
Memleket basshysynyń tapsyrmasymen elimizde de bilimdi ınternasıonalızasııalaý saıasaty iske asyp jatyr. Búginde Qazaqstanda 40 sheteldik joǵary oqý ornymen áriptestik ornatylǵan, onyń ishinde 33 sheteldik ýnıversıtettiń fılıaly jumys isteıdi. Bul fılıaldar elimizdiń ártúrli óńirinde ornalasqan. Árbir fılıal aımaqtyń ereksheligi men ekonomıkasynyń suranysyna saı ashylǵan. Sondyqtan olardyń bilim berý baǵdarlamalary bir-birin qaıtalamaıdy.
«Qazaqstanǵa sheteldik stýdentterdiń qyzyǵýshylyǵy artyp keledi. Bıyl elimizge 35 myńnan astam sheteldik stýdent kelip, bul kórsetkish eń joǵary deńgeıge jetti. Sonymen qatar, buryn negizinen TMD elderinen kelgen stýdentter basym bolsa, qazir Azııa elderinen keletin stýdentter sany artty», deıdi Ǵylym jáne joǵary bilim vıse-mınıstri Gúlzat Kóbenova.
Aıta keteıik, jyl basynan beri stýdentterdi jataqhanamen qamtý maqsatynda 8 757 oryndyq 26 jataqhana paıdalanýǵa berilgen.
