Shymkentte belgili kásipker adam urlaǵany úshin ustaldy

ASTANA. 12 mamyr. Shymkent qalasynyń Ál-Farabı aýdandyq soty kıim-keshek satatyn iri saýda júıesiniń qojaıynyn qamaýǵa alý týraly úkim shyǵardy. Quqyq qorǵaý organdary kásipkerdi adam urlaýǵa qatysy bar dep aıyptap otyr. Bul týraly total.kz habarlady. Tergeý maqsatyna oraı aty-jóni qupııa ustalyp otyrǵan kásipker qazirgi tańda úı qamaqta otyr. Alaıda, polısııa qyzmetkerleri sotqa kúdiktini qamaýǵa alý týraly ótinish bildirgen bolatyn. Al adam urlaýǵa qatysy bar kásipkerdiń kómekshisine izdeý jarııalandy. Adam urlaýdan bólek, iri saýda ıesine zańsyz bostandyǵynan aıyrý, tonaý men ozbyrlyq jasady degen aıyptar taǵylǵan. Quqyq qorǵaý organdary taratqan málimetterge súıensek, jábirlenýshi kásipkerdiń dúkenderiniń birinde taıaý ýaqytqa deıin ákimshi bolyp jumys istegen. «Dúken qojaıyny men onyń kómekshisi qurbandaryn 29 sáýirden 4 mamyrǵa deıin kásipkerdiń saıajaıynda kúshtep ustaǵan. Ekeýi jábirlenýshini kún saıyn soqqynyń astyna alǵan», – deıdi quqyq qorǵaýshylar. Jábirlenýshiniń sózine qaraǵanda, burynǵy bastyǵy ony kúshpen qorqytqan. Kórsetken ozbyrlyqtaryn olar tipti, beınekameraǵa da túsirip alǵan. Tutqynnan qashyp qutylǵan jábirlenýshi polısııaǵa aryzdanǵan. Qazirgi tańda bul oqıǵa boıynsha kásipkerdiń kómekshisine izdeý jarııalandy. Zardap shegýshiniń aıtýynsha, onyń da adam urlaýǵa qatysy bar. Elaman Qońyr. Derek: total.kz. Sýret: mail.ru.