Álemge hám elge áıgili

Kóktemde kórermender «Ope­ralııa» halyqaralyq festıva­liniń mazmundy premeralyq baǵdarlamasyn tamashalady. Onda Rolan Petıdiń úsh horeografııalyq jaýhary – «Arlezıanka», «Bozbala jáne О́lim», «Karmen» baletteri tanystyryldy. Odan keıin Petr Chaıkovskııdiń «Uıqydaǵy arý» aýqymdy qoıylymy usynylsa, jyldyń qorytyndy premerasy Dj.Verdıdiń «Rıgoletto» operasy boldy. Balet trýppasy Leo Delıbtiń «Koppelııasyn» keremet oryndap, Maskat Koroldik opera teatrynyń sahnasyn baǵyndyrdy.

Mádenıet jáne aqparat mınıstrliginiń qoldaýymen «Operalııa» festıvali Italııa, Fransııa, Qytaı, Mońǵolııa, Reseı men Qazaqstannan ártister qatysqan 30-dan astam sharany biriktirdi. Bul ýaqytta qazaqstandyq oryndaýshylardyń álemdik sahnalardaǵy jetistikteri teatrdyń shyǵar­mashylyq bedelin nyǵaıta tústi. Mundaı tabystardyń qatarynda jetekshi solıst Baqtııar Adamjannyń halyqaralyq óner kórsetýleri, tenor Álıhan Zeınollanyń Rossınıdiń «Kúlbıkesindegi» hanzada Don Ramıro partııasynda ıtalııalyq debıýti bar. Sondaı-aq Dıas Qurmanǵazy Ýfada Rýdolf Nýreev atyndaǵy festıvalǵa qatysty, al Leıla Alamanova Rossınıdiń «Reımske saıahat» spektaklindegi jumysy úshin ıtalııalyq synshylardyń joǵary baǵasyna ıe boldy. Italııada teatrdy birin­shi skrıpka – orkestr konsertmeısteri Baǵdat Ábilhanov ta oıdaǵydaı tanystyrdy.

Jas tenor Nursultan Ánýarbek birneshe kezeńnen turatyn kúrdeli irikteýden ótip, Úlken teatrdyń Jastar opera baǵdar­lamasynyń qatysýshysy atandy. Mundaı tabystar «Astana Operanyń» halyqaralyq arenadaǵy bedelin nyǵaıtyp, teatr ártisteri Qazaqstannan tys jerlerde de tanymal ári básekege qabiletti ekenin kórsetti.

Gastrol tarıhyndaǵy jarqyn pa­raqtar Sankt-Peterborda ótken Dance Open festıvalimen de baılanysty. Onda Eýropadaǵy eń iri balet alańdarynyń birinde «Astana Opera» balet trýppasynyń oryndaýynda Rolan Petıdiń «Koppelııasy» usynylǵan edi.

Sonymen qatar teatr elimizde halyq­aralyq baılanystardy damytý boıynsha belsendi jumys atqardy. Úlken zal men K.Baıseıitova atyndaǵy Kameralyq zal sahnalarynda Abaıdyń 180 jyldyǵyna arnalǵan aýqymdy is-sharalar ótip, О́zbekstan Ulttyq baletiniń gastrolderi uıym­dastyryldy, al Rýmynııanyń «Madrıgal – Marın Konstantın» hory alǵash ret Qazaqstanda, «Astana Operada» óner kórsetti. Budan kem túspeıtin taǵy bir jarqyn oqıǵa – «Bah jáne onyń zamandastary» barokko mýzykasy festıvali boldy. Ol teatr horyn, orkestri men solısterin birik­tirgen mazmundy baǵdarlamamen ashyldy.

Jyldyń shyǵarmashylyq boıaýyn basqa da halyqaralyq jobalar tolyqtyrdy: Kameralyq zalda «Koreıa mýzykasy, bıleri men ánderi» konserti ótti, sondaı-aq ózge elderdiń dástúri men mádenıeti arqyly kórermender men oryndaýshylardy birik­tirgen eston mýzykasynyń konserti usynyldy.

Bul bastamalar jyldyń jalpy kórini­simen úılesimdi jarasyp, teatrdyń mádenı dıalogti keńeıtý ári jańa kórermenderdi tartý maqsatynda óz sahnasyn qalaı paıdalanatynyn kórsetip berdi.

Elimizdiń qalalaryna gastroldik saparlar joǵaryda atalǵan oqıǵalardan aýqymdy bolmasa, kem túspedi. Konsertter men spektaklder Aqtóbe, Hromtaý, Rýd­nyı jáne Pavlodar qalalarynda ótti. Teatr elordalyq sahnadan tys jerlerge shyǵatyn dástúrin jalǵastyryp, óz ónerin óńir turǵyndarymen bólisti, zaýyttarda óner kórsetip, mýzykalyq kolledjderde sheberlik sabaqtar berdi.

Jańa qoıylymdar, halyqaralyq tanymaldylyq, gastrol geografııasynyń keńeıýi jáne áleýmettik bastamalar maz­mundy shyǵarmashylyq kelbetti qalyp­tastyrdy.