Álemdik sahna aıbozdary
Iá, jyl basy Dımash Qudaıbergenniń Nıý-Iork tórindegi Madison Square Garden sahnasyndaǵy jeke keshimen bastalyp, ánshiniń naǵyz jankúıerleriniń qoshemet-qolpashyna toldy. Álem halqynyń ánge, ónerge qumar janyn bir núktede toǵystyrdy. Qazaq degen ultty tanystyrdy. Qazaq degen tildi estirtti. Bar álemniń qulaǵy bizdiń Dımashtyń ánin tyńdap turǵandaı kúı keshtik.
Iá, bul jyl jas ónerpazdar úshin jemisti kezeń boldy. Olar álemdegi eń iri mýzykalyq baıqaýlarda baq synap, jeńistiń júldesin arqalap qaıtty. Atap aıtsaq, Erjan Maksım Dýbaıda ótken «Sanremo Best Song – 2025» baıqaýynyń Gran-prı ıegeri, Aleksandr Lım Qazanda ótken XXI «Jańa tolqyn – 2025» konkýrsynyń Gran-prı ıegeri, Almagúl Battalıeva XXXIV «Slavıan bazary» halyqaralyq óner festıvaliniń Gran-prı ıegeri, El Voice toby Stavropolde ótken «Soldier’s Envelope – 2025» halyqaralyq festıvaliniń Gran-prı ıegeri, Almaty oblysy Jambyl aýdany Qaınazar aýyly №1 orta mektebiniń 7-synyp oqýshysy Mıras Naǵashybaı XXIII «Vıtebsk» halyqaralyq balalar mýzykalyq baıqaýynyń jeńimpazy, Jasmın Túzelova Reseıdegi «Golos. Detı» mýzykalyq shoýynyń fınalısi, Ernar Sadyrbaev (Amre) Máskeýde ótken «Intervıdenıe – 2025» halyqaralyq baıqaýynyń fınalısi atandy. Sondaı-aq «Astana Opera» teatrynyń jetekshi solısi, Italııadaǵy La Scala teatry akademııasynyń stýdenti, Portofıno qalasynda ótken XI halyqaralyq «CLIP 2025» opera baıqaýynyń Gran-prı ıegeri – Áıgerim Altynbek, Stavropolde ótken «Soldier’s Envelope – 2025» halyqaralyq festıval-baıqaýynyń jeńimpazy, «El Voice» toby men Italııadaǵy «Open Italy – 2023» baıqaýynda úzdik dep tanylǵan dombyrashylar dýeti «Temirlan & Yernat» jáne basqa da daryndy jastar el mereıin ósirdi.
«Osy kúnge deıin qoldaý kórsetip kele jatqan elime alǵys bildiremin. Kez kelgen jas ónerpaz úshin qoldaý óte mańyzdy. Mádenıet salasyndaǵy áriptesterim de Memleket basshysynyń jan-jaqty qoldaýyn kórip keledi. Bul shyǵarmashylyqqa aıtarlyqtaı áser etedi. Senim men batyldyq syılap, kóp iske qulshyndyrady. Men elimdi odan ári tanyta berýge bar kúsh-jigerimdi salamyn», deıdi ánshi Ernar Sadyrbaev.
Jýyrda belgili kúıshi Janǵalı Júzbaı Túrkııanyń Alanııa qalasynda ótken halyqaralyq is-sharada Ysmaıyl Gaspraly atyndaǵy bedeldi syılyqpen marapattalǵany da esimizde. Aıta ketsek, bul marapat túrki áleminiń birligi men mádenı yntymaqtastyǵyn nyǵaıtýǵa qosqan úlesi úshin tabystalady. Buǵan deıin atalǵan syılyq «Túrki dúnıesine sińirgen eńbegi úshin» ataýymen túrli sala ókilderine (saıasatkerlerge, ǵalymdarǵa, óner adamdaryna, buqaralyq aqparat quraldary qyzmetkerlerine) berilip kelgen. Al bıyldan bastap marapat ǵalymdar men ónerpazdarǵa arnaıy «Ysmaıyl Gaspraly syılyǵy» ataýymen tabystala bastady.
«Qazaq ónerin álemge tanytqym keledi»
Osy oraıda «Astana Opera» teatrynyń jetekshi solısi, Italııadaǵy La Scala teatry akademııasynyń stýdenti, Portofıno qalasynda ótken XI halyqaralyq «CLIP 2025» opera baıqaýynyń Gran-prı ıegeri Áıgerim Altynbekpen tildesýdiń sáti tústi. Álem sahnasyn baǵyndyrǵan ónerpazben opera týraly, tolqynystar men tolǵanystar týraly sóz aǵyttyq.
– XI halyqaralyq «CLIP 2025» opera baıqaýynyń Gran-prı ıegeri atandyńyz. Bul baıqaýǵa jolyńyz qalaı tústi?
– CLIP baıqaýy álemdegi eń bedeldi opera baıqaýlarynyń biri ekenin burynnan biletinmin. Sondyqtan oǵan qatysý men úshin úlken mártebe edi. Baıqaý birneshe irikteý kezeńinen turady. Aldymen halyqaralyq komıssııaǵa beınejazbalar men repertýar jiberdim, sodan keıin Portofınoǵa resmı shaqyrtý aldym. Bul – aılar boıǵy daıyndyqtyń, ustazdarymmen úzdiksiz jumystyń jáne úlken eńbektiń nátıjesi. Eń bastysy, bul sahnaǵa Qazaqstan atynan shyǵý úlken jaýapkershilik ekenin júregimmen sezindim.
– Qandaı shyǵarma oryndadyńyz? Qandaı tolqýly sátter boldy?
– Baıqaý barysynda ár kezeńde túrli stıldegi arııalar oryndaý qajet eken. Men Dj.Pýchchınıdiń «La Bohème» operasynan Mımıdiń arııasyn, Dj.Verdıdiń «II Trovatore» operasynan Leonoranyń arııasyn jáne alty ártúrli harakterdegi
arııalar oryndadym. Eń tolqýly sát fınal aldynda sahna syrtyndaǵy kútý boldy. Zalda álemniń eń bedeldi agentteri men teatr ókilderi otyrdy. Biraq sahnaǵa shyqqan sátten bastap tolqý toqtap, tek obraz ben mýzykany jetkizý jáne partııany abyroımen joǵarǵy deńgeıde oryndap shyǵýdy ǵana oıladym.
– Osyndaı álemdik sahnadaǵy úlken baıqaýlar jas ónerpazǵa ne beredi?
– Mundaı baıqaýlar eń aldymen jas ári jańa bastap kele jatqan opera ánshisi úshin úlken kásibı mektep ekeni ras. Onda qysqa ýaqytta túrli stılde arııalar aıtasyń. Psıhologııalyq turǵyda kez kelgen jaǵdaıǵa daıyn bolýǵa ári úlken sahnaǵa beıimdelýge úıretedi. Sondaı-aq bul álemdik kásibı ortaǵa ený múmkindigi dep aıtar edim, óıtkeni seni teatr dırektorlary, agentter, dırıjerler kóredi, jańa jobalarǵa, operalarǵa, konsertterge shaqyrý alasyń. Biraq, eń bastysy, ózińe degen senimdilikti nyǵaıtady.
– Súıikti operańyz qandaı?
– Djýzeppe Verdıdiń «La Traviata» operasy. Bul shyǵarma men úshin tek ádemi mýzyka ǵana emes, adam janynyń tereńdigin, mahabbat pen qurbandyqtyń shynaıy mánin kórsetetin úlken fılosofııalyq týyndy. Onda mýzyka men dramatýrgııa bir-birimen óte názik baılanysqan, árbir arııa keıipkerdiń ishki álemin ashyp beredi. Men úshin árqashan jańasha ashylatyn, ár oryndaǵan saıyn jańa qyryn kórsetetin erekshe shyǵarma.
– Aldaǵy shyǵarmashylyq jospar qandaı?
– Qazir basty maqsatym – repertýarymdy keńeıtý. Keıingi ýaqytta kóptegen Eýropa teatrlaryna shaqyrý kelip jatyr. Jaqynda ǵana álemge áıgili La Skala teatrynda debıýt jasadym. Keremet spektakl qoıyldy. Sodan keıin de kóptegen shaqyrý tústi. Árıne, óz elimde de belsendi óner kórsetip, jastarǵa arnalǵan sheberlik sabaqtaryn ótkizgim keledi. Aldaǵy ýaqytta Eýropamen ǵana shektelmeı, álemniń jetekshi opera teatrlarynyń sahnasynda turaqty óner kórsetip, qazaq ónerin álemge tanytqym keledi.
– Áńgimeńizge rahmet. Sáttilik tileımiz.
