Tııanaqtylyq bıýrokratııaǵa jol bermeıdi
Memleket basshysynyń qoǵamdyq qaýipsizdikti nyǵaıtý men qarjy sektoryn retteý jónindegi tapsyrmalaryn júzege asyrý sheńberinde Parlament birqatar negizgi zań jobasyn qabyldaǵany málim. Úkimet otyrysynda zań jobalaý jumysynyń qorytyndylary týraly Ádilet mınıstri Erlan Sársembaev habarlady. Onyń aıtýynsha, 2025 jylǵa arnalǵan jospar tolyǵymen oryndalǵan. Áleýmettik mańyzdy bastamalarǵa erekshe nazar aýdaryldy.
Atap aıtqanda, Parlament 5 zań qabyldap, Prezıdentke qol qoıýǵa joldaǵan. Olardyń qatarynda quqyq buzýshylyqtyń aldyn alý, bankter men bank qyzmeti týraly qujattar bar. Buǵan qosa Memleket basshysy mindetti medısınalyq saqtandyrý máselelerine qatysty túzetýler men úshjyldyq kezeńge arnalǵan respýblıkalyq bıýdjetti qosa alǵanda, 3 zańǵa qol qoıdy. Qazir Májilistiń qaraýynda 14 zań jobasy jatyr.
«Bul – Memleket basshysynyń tikeleı tapsyrmasy boıynsha ázirlengen qoǵam úshin mańyzdy zańdar. Barlyq engizilgen jobalardy qosa alǵanda, 2025 jylǵa arnalǵan jospar oryndaldy», dedi E.Sársembaev.
Onyń aıtýynsha, kelesi jylǵy josparda 12 zań jobasyn ázirleý qarastyrylǵan, olardyń negizgileri naqty áleýmettik jáne ekonomıkalyq mindetterdi sheshýge baǵyttalǵan. Áleýmettik qorǵaý salasynda turǵyn úıdi tabıǵı apattardan mindetti saqtandyrý týraly zań, sondaı-aq eńbek zańnamasy men áleýmettik qamsyzdandyrý júıesine túzetýler ázirlengen. Buǵan qosa memlekettik múlik máseleleri boıynsha túzetýler, onlaın-platformalar men mass-medıa máseleleri týraly zańnama daıyndalyp jatyr. О́nerkásip bloginde munaı-gaz hımııasy ónerkásibi týraly zań jobasyn engizý josparlanǵan. «Parlamentke aldaǵy birinshi jartyjyldyqta – 5, ekinshi jartyjyldyqta 7 zań jobasyn engizýdi josparladyq. Prezıdenttiń áleýmettik salaǵa da, sıfrlyq damýǵa da qatysty tapsyrmasyn sapaly pysyqtaýǵa basymdyq berildi», dedi mınıstr.
Premer-mınıstr jyl boıy atqarylǵan jumystardy taratyp aıtty. «Bıyl mańyzdy zańnamalyq bastamalar qabyldandy. Medısınalyq saqtandyrý, quqyq buzýshylyq profılaktıkasy, balamaly energetıkany damytý, ınvestısııalyq qorlardy retteý men basqa da mańyzdy baǵyttar boıynsha birqatar zań jobalary ázirlenip, Parlament qaraýyna engizildi», dedi O.Bektenov.
Mindetti áleýmettik medısınalyq saqtandyrýǵa qatysty qabyldanǵan sharalar ár azamat úshin qoljetimdi ári sapaly medısınalyq qyzmet kórsetýge múmkindik beredi. Investısııalyq qorlar týraly jańa zań jobasynyń erejeleri kapıtal naryǵyn odan ári tıimdi damytýǵa yqpal etedi. Buǵan qosa belgilengen merzimderdiń saqtalýyna qatysty máseleler de bar. Mysaly, densaýlyq saqtaý týraly zań jobasyn Úkimetke engizý merziminen 30 kúnge keshiktirildi.
«Mundaıdy doǵarý qajet. Memlekettik organdardyń birinshi basshylary zań jobalaý jumystary josparynyń ýaqtyly iske asyrylýyn tikeleı baqylaýda ustaýǵa tıis. Sondaı-aq birqatar jobaǵa Úkimet Apparaty men Prezıdent Ákimshiliginiń eskertýlerinen keıin kóp ózgerister engizilip, qaıta pysyqtalady», dedi Úkimet basshysy.
Jalpy alǵanda, osy jylǵa arnalǵan zań jobalary Parlament qaraýyna engizildi. Demek jospar oryndaldy dep sanaýǵa bolady. Úkimet kelesi jyly zań shyǵarý jumysynyń ekonomıka men áleýmettik salanyń mańyzdy aspektilerine qatysty negizgi baǵyttaryna basa mán beretin bolady. Sonyń biri – memlekettik múlikti basqarýdy odan ári jetildirý.
«Memlekettiń ekonomıkaǵa qatysý shegin naqty aıqyndap, basqarý isine qatysty quqyqtyq talaptardy bekitip alý qajet. Biz jumyskerlerdiń quqyqtaryn qorǵaý men áleýmettik qamsyzdandyrý júıesin nyǵaıtý úshin normatıvtik bazany jetildirý baǵytynda belsendi jumysty jalǵastyramyz. Sondaı-aq munaı-gaz hımııasy ónerkásibin damytýdyń júıeli ári keshendi tásilin qamtamasyz etetin zańnamalyq bastamalar bar», dedi Premer-mınıstr.
Kelesi jyly barlyǵy 12 zań jobasyn ázirleý kózdelgen. Osyǵan baılanysty myna máselelerge nazar aýdarý qajet. Birinshi, memlekettik organdardyń birinshi basshylary árbir zań jobasynyń sapaly ázirlenýi men olardyń Májiliske ýaqtyly engizilýin qatań baqylaýda ustaýǵa tıis. Ekinshi, memlekettik organdardyń arasynda vedomstvoaralyq úılestirýdi qamtamasyz etý mańyzdy. Zań jobalaryn kelisý barysynda basy artyq bıýrokratııadan arylyp, jedel jumys isteý kerek.
Infografıkany jasaǵan – Amangeldi Qııas, «EQ»
Ulttyq quramanyń úlken synǵa daıyndyǵy
Keler jyly Italııanyń Mılan men Kortına-d’Ampesso qalalarynda ótetin XXV qysqy Olımpıada oıyndary álem nazaryn ózine aýdaratyn aıtýly sport merekesi bolmaq. Úkimet otyrysynda Týrızm jáne sport mınıstri Erbol Myrzabosynov osy dúbirli dodaǵa Qazaqstan ulttyq quramasynyń daıyndyq barysy týraly keńinen baıandady.
Mınıstrdiń aıtýynsha, 6-22 aqpan aralyǵynda ótetin Olımpıadaǵa 93 elden shamamen 3 myń sportshy qatysyp, 116 medal jıyntyǵy sarapqa salynady. Elimizdiń quramasy sporttyń 10 túrinen 58 medal jıyntyǵynda baq synaýdy kózdep otyr. Olardyń qatarynda bıatlon, konkımen júgirý, mánerlep syrǵanaý, short-trek, taý shańǵysy, shańǵy jarystary men qossaıysy, tramplınnen sekirý, sondaı-aq frıstaıldyń mogýl men akrobatıka baǵyttary bar. Ulttyq quramanyń sany shamamen 35 sportshy bolady dep kútilýde.
Qazir otandyq sportshylar Olımpıada lısenzııalaryn kezeń-kezeńimen jeńip alýda. Mánerlep syrǵanaýdan Sofıa Samodelkına men Mıhaıl Shaıdorov eki jeke resmı lısenzııaǵa ıe bolsa, short-trekten – 9, konkımen júgirýden 12 joldama alynǵan. Bul – Pekın-2022 oıyndarynda 34 sportshy qatysqan kórsetkishpen shamalas deńgeı.
Mınıstr elimizde qysqy olımpıadalyq sporttyń 13 túri júıeli túrde damyp kele jatqanyn atap ótti. Búginde respýblıka boıynsha qysqy sportqa arnalǵan 1262 sport nysany jumys isteıdi. Sonyń nátıjesinde qysqy sportpen turaqty aınalysatyn azamattar sany 149 myńǵa jetip, sport mektepterinde tárbıelenip jatqan balalar men jasóspirimder qatary 17 myńdy qurady. Ulttyq qurama halyqaralyq jarystardaǵy naqty nátıjeler negizinde jasaqtalady.
Halyqaralyq arenada joǵary jetistikke jetken sportshylar da erekshe ataldy. Anastasııa Gorodko frıstaıl-mogýldan jasóspirimder arasyndaǵy 2025 jylǵy álem chempıony atanyp, eresekter arasynda qola júlde ıelendi. Mıhaıl Shaıdorov álem chempıonatynda kúmis júldeger bolsa, Sofıa Samodelkına áıelder arasyndaǵy Gran-prıde el tarıhyndaǵy alǵashqy kúmisti jeńip aldy. Short-trekten Denıs Nıkısha, konkımen júgirýden Evgenıı Koshkın, frıstaıl-akrobatıkadan Sherzod Hashırbaev pen Roman Ivanovtyń nátıjeleri de ulttyq quramanyń áleýetin aıqyndaı túsedi.
Olımpıadaǵa sapaly daıyndyq úshin keshendi jospar jasalyp, 178 oqý-jattyǵý jıyny ótkizilgen. Sportshylar 125 halyqaralyq jarysqa qatysyp, daıyndyqqa barlyǵy 13,3 mlrd teńge baǵyttalǵan. Ulttyq quramamen álemdik deńgeıdegi 13 sheteldik jattyqtyrýshy-keńesshi jumys istep jatyr.
Buǵan qosa XIV qysqy Paralımpıada oıyndaryna daıyndyq ta nazardan tys qalmaǵan. Mılan men Kortınada ótetin bul dodada Qazaqstan parashańǵy jarysy men parabıatlonnan óner kórsetpek. Qazirdiń ózinde 7 sportshy 10 lısenzııa jeńip alyp otyr.
Úkimet basshysy Olımpıada oıyndary elimizdiń halyqaralyq ımıdjin nyǵaıtý isinde óte mańyzdy ról atqaratynyna toqtaldy. «Sportshylarymyz álemniń basty baıraqty básekelerine ózderi men tálimgerleriniń tabandy eńbeginiń nátıjesin ǵana emes, búkil ultymyzdyń abyroıyn qorǵaý úshin barady. Memleket basshysy buqaralyq jáne kásibı sportty damytý ár kez basymdyqqa ıe bolyp qala beretinin aıtyp keledi. Sondyqtan elimizde sportty damytý baǵytynda keshendi shara qabyldanyp, sportshylardyń sapaly daıarlanýy úshin tıisti jaǵdaı jasalyp jatyr. 2023–2025 jyldary osy maqsatqa bıýdjetten 360 mlrd teńgeden astam qarajat bólindi», dedi ol.
Qysqy sport túrlerin damytý úshin elimizde qajetti bazalyq ınfraqurylym men qolaıly klımattyq jaǵdaılar bar.
Bul oraıda salalyq sport federasııalary basty ról atqarady. Buǵan qosa ulttyq komandalar, jattyqtyrýshylar quramy men sport rezervi jasaqtalyp, naqty sport túrlerin damytýdyń uzaqmerzimdi strategııasy aıqyndalady. О́tken jyly Kanvon qalasynda ótken jasóspirimder arasyndaǵy Olımpıada oıyndarynda otandyq sportshylardyń tabysty óner kórsetýin sport rezervin daıarlaýdyń mańyzdy nátıjesi retinde baǵalaýǵa bolady.
«Bul jetistikti alda Italııada ótetin qysqy Olımpıada oıyndarynda odan ári nyǵaıtyp, eseleı túsý qajet. Jalpy, sportshylardyń ishki tártibi, tabandy, alǵyr ári naǵyz komandalyq rýhy olardy jeńis jolyna jeteleıdi dep senemiz. Jahandyq dodada ádil saıys, myqty erik-jiger men úzdik nátıje tileımiz! Ulttyq Olımpıada komıtetiniń prezıdenti Gennadıı Golovkın óziniń qaısar rýhymen sportshylardyń jigerin janyp, jeńiske yntalandyrady», dedi O.Bektenov.
Elimiz sportshylardy maqtan tutyp, zor senim artatynyn jetkizgen Úkimet basshysy, baıraqty básekeniń bastalýyna sanaýly kúnder qalǵanyn eske saldy. «Barlyq daıyndyq sharalary tolyq kólemde aıaqtalýy qajet. Osyǵan baılanysty birqatar tapsyrma beremin», dedi ol.
