Foto: JI
Almashan Smatlaevtyń aıtýynsha, osy baǵyttaǵy jańa erejeler atmosferalyq aýany qorǵaý salasyndaǵy jaǵdaıdy baqylaý men retteýge arnalǵan pılottyq jáne uıymdastyrýshylyq sharalarǵa baılanysty engiziledi.
«2026 jyldan bastap aqyly júıeni engizý josparlanbaǵan, óıtkeni ol úshin zańnamaǵa tıisti ózgerister engizý qajet. Aldymen pılottyq joba synaqtan ótkiziledi, onyń artyq-kem tustary saralanyp, sodan keıin ǵana ári qaraıǵy damý baǵyty aıqyndalady», dedi Almashan Smatlaev.
Qazir Almatydaǵy kólik sany boıynsha jospar ázirlengen. Bul qujatqa sáıkes qalanyń shyǵys, batys jáne soltústik bólikterinde kólikke aýysyp miný toraptaryn salý kózdelgen. Atalǵan nysandarǵa jańa metro jelilerin jáne LRT baǵyttaryn tartý, sondaı-aq qosymsha avtobýs marshrýttaryn iske qosý josparlanyp otyr.
Ákim orynbasarynyń dereginshe, búginde Almaty kóshesinde kún saıyn 1 mıllıonnan astam avtokólik júredi.
«Álemdik tájirıbede turǵyndardyń shamamen 70%-y qoǵamdyq kólikti, al 30%-y jeke avtokólikti paıdalanady. Almatyda bul kórsetkish kerisinshe. Qozǵalystyń 60%-y jeke kólikke, 40%-y qoǵamdyq kólikke tıesili. Álemdik úlgige kezeń-kezeńimen kóshý nátıjesinde turǵyndardyń qoǵamdyq kólikti tańdaýyna qaraı qalada avtokólik sany shamamen 300 myńǵa qysqarýy múmkin. Bul ekologııalyq jáne kólik ahýalyn edáýir jaqsartady. Dese de bul birtindep júzege asatyn úderis jáne jýyq arada sheshile qoıatyn másele emes», dedi Almaty qalasy ákiminiń orynbasary.
Aıta keteıik, Almaty metrosy 2040 jyly qaı aýmaqtardy qamtıtyny anyqtaldy.
Almatynyń bas josparynda megapolıs aýmaǵyn jáne oǵan irgeles eldi mekenderdi qamtıtyn úlken aınalma metro jelisin salý, sondaı-aq jeńil relsti kólik (LRT) júıesin iske qosý qarastyrylyp otyr.
