Uly Otan soǵysyndaǵy Jeńistiń 70 jyldyǵyn atap ótýge arnalǵan sharalar baǵdarlamasynyń «Jelbire, Jeńis jalaýy!» atty ádebı-sazdy kompozısııa betashary naq osy jerden bastaldy. Bul týraly egemen tilshisi habarlady.
«Nur Otan» jastar qanatynyń belsendileri «Biz maqtan tutamyz jáne umytpaımyz» aksııasyn uıymdastyryp, jurtshylyqqa «Jeńis lentasyn» taratqannan keıin eske alý mıtıngisi boldy. «Máńgilik alaýǵa» qushaq-qushaq gúl desteleri qoıylyp, otan qorǵaý jolynda sheıit bolǵan bozdaqtardyń arýaqtaryna taǵzym etildi. Soǵys ýaqytyndaǵy kórinisterdi beıneleıtin sahnagerler otyrǵan avtopoıyz, otty jyldardaǵy áskerı n sherýi, Qazaqstan Respýblıkasy Ulttyq Ulany Áskerı ınstıtýty kýrsanttarynyń marsh-parady qala turǵyndaryna erekshe áser qaldyrdy. «Máńgilik polk» kolonnasynyń qozǵalysyna úlken de, kishi de erip, Pýshkın – Sútishev – Jambyl - Qazaqstan Konstıtýsııasy kóshelerin boılaı júrip, mádenıet jáne demalys saıabaǵyndaǵy Dańq obelıskisine aıaldady. Bul jerde soǵys jáne tyl ardagerlerin jurtshylyq alaýlata-jalaýlata qarsy alyp, zor qoshemet kórsetti. S. Muqanov atyndaǵy qazaq sazdy-drama teatry jáne N. Pogodın atyndaǵy orys drama teatry shyǵarmashylyq ujymdarynyń qatysýymen «Ol kúnderdiń óshpes dańqy» teatrlandyrylǵan kórinisi qoıyldy. «Máńgi jas rota», «Jeńis keskini» aksııalary, «Urpaqtar umytpasyn» qoıylymy, teatrlandyrylǵan maıdan mınıatıýralary, soltústikqazaqstandyq Keńes Odaǵynyń batyrlary týraly «Biz dańqty Jeńisti umytpaımyz» kórmesi, 40-shy jyldardyń bı marafony, taǵy basqa sharalar mazmundylyǵymen kórermenderdi baýrap aldy.
Abaı-Pýshkın eskertkishi janynda kózi tiri maıdangerlerge arnalǵan «Erlikterińizge taǵzym etemiz» ádebı-sazdy kompozısııa tamashalansa, Táýelsiz stellasy mańaıynda usynylǵan «Atamnyń jeńisi – meniń jeńisim» balalar konserttik baǵdarlamasy, «Jeńis rekordy» jastar sporttyq aksııasy mereke shyraıyn asha tústi. 20-shy yqsham aýdanda ornalasqan Jeńis saıabaǵy da erekshe dýmanǵa bólendi. Munda Dańq allaeıasy ashyldy. Uly Otan soǵysy ardagerleri men qatysýshylaryna arnalǵan áskerı-dala ashanasy jumys istedi. Odan qalalyqtar da dám tatty. Áskerı-sporttyq estafeta, shaǵyn fýtboldan jarystar uıymdastyryldy. Jeńis kúnine oraı uıymdastyrylǵan moto jáne avtosherýlerge 20 motosıkl, 80 avtomobıl qatysyp, Pestroe kóli jaǵasynana Jeńis saıabaǵyna deıin júrip ótti. О́ńirdiń ózge jerlerinde de toılaý sharalary jan-jaqty kórinis tapty. Novonıkolskoe eldi mekeninde Keńes Odaǵynyń batyry T.Kýrenkovtyń músini ornatyldy. Astrahanka, Novoıshım, Beskól aýyldarynda skverler, obelıskiler boı kóterdi.
О́mir Esqalı.
Derek, sýret: egemen.kz
