Kólik apatynan bolatyn adam ólimi 9,4%-ǵa azaıdy: Prezıdent jol qaýipsizdigi sharalarynyń nátıjesi týraly

Memleket basshysy kólik apaty búginde Qazaqstan úshin ǵana emes, kóptegen elder úshin ózekti másele bolyp otyrǵanyn atap ótti. Onyń aıtýynsha, basty sebepterdiń biri – avtokólik sanynyń kúrt ósýi.

«Elimizdegi avtokólik sany byltyrdyń ózinde 300 myńǵa, al, sońǵy bes jylda 1,7 mıllıonǵa kóbeıdi. Onyń ústine, shamamen 3 mıllıon tranzıttik avtokólik elimizdiń aýmaǵy arqyly ótedi. Avtokólik kóbeıgen saıyn, jol ústinde apat bolý yqtımaldyǵy arta túsedi», dedi Prezıdent.

Osyǵan baılanysty Ishki ister mınıstrligi quqyq buzýshylyqtyń aldyn alý jáne ony anyqtaý jumystaryn kúsheıtken. Infraqurylym jetildirilip, baqylaý sharalary nyǵaıtylǵan. Aıyppul mólsherin arttyrý týraly sheshim de, eń aldymen, jol qaýipsizdigin qamtamasyz etý maqsatynda qabyldanǵan.

Qabyldanǵan sharalardyń nátıjesinde joldaǵy ahýal jaqsaryp keledi. Degenmen Prezıdent qoǵamnyń jol erejesin saqtaýǵa nemquraıly qaraýy barlyq bastamanyń tıimdiligin tómendetetinin eskertti. Onyń aıtýynsha, aýyr apattardyń basym bóligi júrgizýshilerdiń qarapaıym, biraq mańyzdy talaptardy saqtamaýynan bolady.

«Keıbir damyǵan elderde kólik apattarynyń aldyn alý úshin jańa tujyrymdama engizilip jatyr. Soǵan sáıkes ár adam polısııa qyzmetkerlerine ustalyp qalýdan qoryqqandyqtan emes, óziniń jáne basqa adamdardyń qaýipsizdigin oılaǵandyqtan jol erejesin saqtaýǵa tıis.

Buǵan qosa, osy salaǵa jańa tehnologııalardy, sonyń ishinde jasandy ıntellektini keńinen engizgen jón. Biz kólikter toqtaýsyz júretin kósheler salamyz», dedi Qasym-Jomart Toqaev.

Memleket basshysy ásirese avtobýstardyń jol apatyna jıi ushyrap jatqanyn aıtyp, bul máselege erekshe nazar aýdarý kerektigin aıtty.

Eske salaıyq, búgin Qazaqstan Prezıdenti Qasym-Jomart Toqaev «Turkistan» gazetine keń kólemdi suhbat berdi. Onda ol kólik jáne logıstıka salasyn damytý Qazaqstan úshin strategııalyq mańyzy bar basymdyq ekenin atap ótti. Qasym-Jomart Toqaev Nursultan Nazarbaevtyń Vladımır Pýtınmen kezdesýleri beıresmı sıpatqa ıe ekenin aıtty. Sondaı-aq Prezıdent sońǵy jyldary tarıh­ty talqylaý sánge aınalǵanyn sóz etti. Túrli pod­kast­tar, fılmder, maqalalar men kitap­tar shyǵyp jatqanynan habardar ekenin jetkizdi.