Foto: Ashyq derekkóz
2025 jyldyń jeltoqsan aıynyń qorytyndysy boıynsha teńge baǵamy 1 dollar úshin 505,73 teńgege deıin 1,3%-ǵa nyǵaıdy. Osy kezeńde Qazaqstan qor bırjasyndaǵy saýda-sattyqtyń ortasha kúndik kólemi 280 mln dollarynan 359 mln dollaryna deıin artty. Aı ishindegi jalpy saýda kólemi 7,9 mlrd dollaryn qurady.
«Jalpy 2025 jyldyń qorytyndysy boıynsha teńge baǵamy 3,7%-ǵa nyǵaıyp, valıýta naryǵyndaǵy ótimdilik aıtarlyqtaı artty», dep habarlady Ulttyq bank.
Jyldyq eseppen saýda-sattyqtyń jıyntyq kólemi 15%-ǵa ulǵaıyp, 63 mlrd dollarǵa jetken.
Ulttyq banktiń málimdeýinshe, respýblıkalyq bıýdjetke transfertterdi qamtamasyz etý jáne «Taldyqorǵan – Úsharal» magıstraldyq gaz qubyryn salý jónindegi ınfraqurylymdyq jobany qarjylandyrý maqsatynda 2025 jylǵy jeltoqsan aıynda Ulttyq qordan 400 mln AQSh dollaryna valıýta satylǵan.
«Bul jalpy saýda kóleminiń shamamen 5%-yn qurady», delingen habarlamada.
Sondaı-aq Ulttyq bank 2025 jyly Ulttyq qordan satylǵan valıýtanyń jalpy kólemi 8,2 mlrd dollarǵa jetkenin atap ótti. Al Úkimettiń aldyn ala boljamdy ótinimderine sáıkes, 2026 jylǵy qańtar aıynda Ulttyq qordan 350 – 450 mln dollar kóleminde valıýta satý josparlanyp otyr.
Aınalaý operasııalary aıasynda jeltoqsan aıynda 475 mlrd teńge alynǵan.
«2025 jyly altyn-valıýta rezervterinen satylǵan valıýtanyń kólemi 7 mlrd AQSh dollaryn qurady», delingen Ulttyq banktiń aqparatynda.
Bank ókilderiniń aıtýynsha, alynbaı qalǵan ótimdilikti, aınalaý operasııalaryn jáne altyn baǵasynyń eleýli ósýin eskere otyryp, 2026 jyldyń birinshi toqsanynda shamamen 1,1 trln teńge balamasynda shetel valıýtasyn satý josparlanyp otyr.
«Ulttyq qor qarajatymen operasııalar júrgizý kezinde jáne aınalaý tetigin iske asyrý barysynda biz naryqtyq beıtarap qaǵıdatty qatań saqtaımyz. Bul valıýtany turaqty ári birkelki satýdy bildiredi», dep málimdedi Ulttyq bank.
Jeltoqsan aıynda Ulttyq bank valıýtalyq ıntervensııa júrgizbegen. Sonymen qatar, kvazımemlekettik sektor sýbektileriniń valıýtalyq túsiminiń bir bóligin mindetti satý aıasynda shamamen 315 mln dollar satylǵan.
Biryńǵaı jınaqtaýshy zeınetaqy qorynyń valıýtalyq aktıvteri 40%-dan joǵary bolǵandyqtan, jeltoqsan jáne qańtar aılarynda zeınetaqy aktıvteri úshin dollar satyp alý josparlanbaǵan.
«Qysqamerzimdi perspektıvada teńgeniń dınamıkasy naryq qatysýshylarynyń kútýlerine, salyq tólemderine, álemdik naryqtaǵy jaǵdaıǵa jáne geosaıası faktorlarǵa baılanysty bolady», dep atap ótti Ulttyq bank.
Vedomstvo altyn-valıýta rezervteriniń saqtalýyn qamtamasyz etetin jáne teńgerimsizdiktiń jınalýyna jol bermeıtin ıkemdi aıyrbas baǵamy rejımin ustanýdy jalǵastyratynyn málimdedi.
