Talqylaýǵa qalalyq polısııa, jergilikti ákimdiktiń ishki saıasat, turǵyn úı-kommýnaldyq sharýashylyq basqarmalarynyń ókilderi, sondaı-aq «Qapshaǵaı – Altyn Alma» tutynýshylyq baqsha kooperatıviniń (TBK) músheleri qatysty.
«Qapshaǵaı – Altyn Alma» TBK ókilderiniń aıtýynsha, daý kooperatıv músheleriniń qarajaty esebinen salynǵan jáne kútim jasalǵan, uzyndyǵy 3 600 metrge jýyq sý jelisine qatysty bolyp otyr. Keıinnen atalǵan nysan resimderdiń zańdylyǵy kúmándi jaǵdaıda jáne quqyqtardyń aýysýy tıisti túrde tirkelmeı, úshinshi tulǵalardyń paıdasyna resimdelip ketken.
Ashat Raqymjanov bul jaǵdaıdy zerdeleý kezinde múlikti resimdeýdiń zańdylyǵyna qatysty suraqtar týyndaǵanyn aıtty.
«Biz jaǵdaıdy egjeı-tegjeıli qarastyra kelip, jaı seriktestikter dep atalatyn múlikti resimdeý zańdylyǵyna qatysty kóptegen máselelerdi baıqadyq. Qazirgi tańda zańnamany saqtamaý belgileri bar deýge bolady», dedi depýtat.
Onyń aıtýynsha, seriktestikterdi qurý hattamalaryn resimdeý prosesi men ondaǵy qoltańbalardyń shynaıylyǵyna qatysty jaıt erekshe nazar aýdaryp otyr.
Kezdesý barysynda turǵyndardyń 1998 jyly óz esebinen salǵan sý qubyry jelilerin berýi máselesi de qozǵaldy. Ashat Raqymjanov atap ótkendeı, turǵyndar sý jelilerin óz kúshimen salyp, oǵan kútim jasaǵan. Sondaı-aq shyǵyndaryn kóterip, salyq tólegen. Biraq keıinnen bul múlik úshinshi tarapqa berilgen. Onyń pikirinshe, seriktestikter qurý kezinde buzýshylyqtar bolǵan jaǵdaıda bul resimdeý prosesi júrgizilmeýi kerek edi.
Jıyn qorytyndysy boıynsha Qonaev qalasynyń prokýratýrasy jaǵdaıdy baqylaýǵa alǵanyn jetkizdi. Qadaǵalaýshy organnyń aldyna osy istiń barlyq mán-jaıyn, sonyń ishinde kondomınıým nysandaryn resimdeý men menshik ıeleriniń quqyn qorǵaýǵa qatysty jaıttardy qaıtadan jan-jaqty qaraý máselesi qoıyldy.
«Negizgi mindet – ádildikti qaıta ornatý. Infraqurylymǵa qarajat salǵan adamdar óz múddelerin qorǵaýǵa jáne ketken shyǵyndaryn óteýge quqyly. Barlyq sheshim tek quqyq negizinde qabyldanýǵa tıis», dedi Ashat Raqymjanov.
Kezdesý barysynda depýtat Májilistegi Jalpyulttyq sosıal demokratııalyq partııa (JSDP) fraksııasynyń zańnamany jetildirý qyzmeti týraly baıandady. Atap aıtqanda, tıisti zań jobasy aıasynda baý-baqsha seriktestikterin memlekettik qoldaý kúsheıetinine toqtaldy. Partııanyń bastamalary azamattardyń ótinishterine jáne saıajaı birlestikteriniń jergilikti jerlerde kezdesetin naqty problemalaryna negizdelgenin jetkizdi.
Depýtat sondaı-aq óńirlerge jumys saparlary, saılaýshylarmen kezdesýler jer-jerdegi júıeli problemalardy anyqtaýǵa, oǵan qoldanystaǵy zańnama sheńberinde memlekettik organdardyń nazaryn aýdarýǵa múmkindik beretinin atap ótti.
Májilis depýtattarynyń óńirlerdegi kezdesýleri 5-13 qańtar aralyǵynda jalǵasady. Jumys saparlary barysynda AMANAT, Aýyl, Aq jol, JSDP, Qazaqstan Kommýnıstik partııasy jáne Respublica saıası partııalarynyń parlamenttik fraksııalarynyń depýtattary saılaýshylardy qabyldanǵan zańdar týraly habardar etedi. Olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.
