Jobany О́skemen qalasynyń týmasy, IT-salasynda tájirıbesi bar Maqpal Oraqqyzy dekret demalysy kezinde bastaǵan.
Stomatologııadaǵy kúndelikti jumys kóbine qolmen júrgiziletin kestelerge, ártúrli messendjerdegi shashyrańqy ótinimderge jáne tolyq júıelenbegen medısınalyq kartalarǵa táýeldi. Mundaı shashyrańqylyq klınıka tabysyna, pasıenttiń qaıta kelýine jáne marketıng tıimdiligine tikeleı áser etedi. «MacDent» osy olqylyqtyń ornyn bir júıeden basqarylatyn sıfrlyq ekojúıe arqyly toltyrýdy maqsat etken.
Platforma arqyly pasıent onlaın jazyla alady, usynylǵan em-sharalar baqylaýda bolady, kelesi qabyldaýdy eske salý fýnksııasy iske qosylǵan. Sondaı-aq klınıka ıesi áleýmettik jelidegi jarnamanyń tıimdiligin, qarjylyq kórsetkishterdi jáne pasıentterdiń pikirin taldaı alady.
«MacDent» «Astana Hub» akselerasııasyna ıdeıa túrinde kelip, qysqa ýaqyt ishinde MVP jasady. Túsindire keteıik, MVP (Minimum Viable Product) – jobanyń naryqqa shyǵýǵa daıyn eń alǵashqy, eń yqsham nusqasy. Iаǵnı startap komandasy ıdeıanyń ómirsheńdigin tekserý úshin eń qajetti fýnksııalardy ǵana jınaqtap, ony naqty klıentterge kórsetedi. Osy arqyly stomatologııalyq klınıkalardan alǵashqy keri baılanys alyp, ónimniń qaı tusyn jetildirý keregin anyqtaıdy.
Atalǵan platformanyń ıgiligin elimizde 1 800-den astam stomatologııa kórip otyr. Startap sonymen qatar О́zbekstan, Qyrǵyzstan jáne Reseı naryǵynda da bar. Joba jetekshisi «Ishki naryqta 25% úleske jetemiz» degen maqsat qoıyp otyr. Maqpal Oraqqyzynyń aıtýynsha, stomatologııada eń qıyn másele – derektiń ár jerde shashyrap júrýi.
«Pasıenttiń jazylýy bir jerde, em jospary ekinshi jerde, tólem men jarnama esebi úshinshi jerde qalyp qoıady. Sonyń saldarynan klınıka ýaqyt ta joǵaltady, aqsha da joǵaltady, eń bastysy – pasıentpen baılanys álsireıdi. Al bizdiń startap maqsaty – osy úderisti bir júıege jınap, dáriger men ákimshige kúndelikti jumysty jeńildetý, al klınıka ıesine naqty sıfr arqyly basqarýǵa múmkindik berý», deıdi ol.
Búginde «MacDent» stomatologııa salasyndaǵy myńdaǵan klınıkanyń jumysyn bir arnaǵa toǵystyryp, ákimshilik úderisti jeńildetken birden-bir startap. Sondyqtan «MacDent» sekildi sıfrlyq sheshimder stomatologııadaǵy «qaǵazbastylyqty» qysqartyp qana qoımaı, klınıkany derekke súıenip basqarý mádenıetin qalyptastyryp, salanyń jańa damý deńgeıine jol ashpaq.
