Keńes barysynda Almatyda qalalyq basqarýdaǵy sıfrlyq sheshimder men jasandy ıntellektini damytý máseleleri talqylanyp, servısterdi sıfrlandyrý mindetteri aıqyndaldy.
Qala basshysynyń aıtýynsha, talqylanǵan bastamalar Memleket basshysy jarııalaǵan Sıfrlandyrý jáne jasandy ıntellektini damytý jyly aıasynda júzege asyrylady jáne qalanyń ári turǵyndardyń naqty qajettiligine baǵyttalǵan qoldanbaly sıpatta bolýǵa tıis. Sıfrlyq transformasııanyń basym baǵyttaryn talqylaı kele keńes qatysýshylary turǵyndar úshin elektrondyq servısterdi damytý, ákimdiktiń ishki úderisterin sıfrlandyrý, kólik, turǵyn úı-kommýnaldyq sharýashylyq, ekologııa jáne qoǵamdyq qaýipsizdik salalaryna, sondaı-aq bilim berý men densaýlyq saqtaý júıesine zııatkerlik sheshimderdi engizý máseleleriniń mańyzdy ekenin atap ótti.
Almaty ákimi sıfrlandyrý qalalyq qyzmetterdiń sapasyn arttyrýǵa, basqarýshylyq sheshimderdiń ashyqtyǵyn qamtamasyz etýge jáne turǵyndar úshin qolaılylyqty kúsheıtýge tikeleı áser etýge tıis ekenin ári derektermen júıeli jumys júrgizý men sıfrlyq sheshimderdi belsendi engizý osy maqsattarǵa qol jetkizýdiń negizgi sharttary ekenin atap ótti. Keńes qorytyndysy boıynsha qala basshysy 2026-2030 jyldarǵa arnalǵan Smart City strategııasy men sıfrlyq transformasııa jol kartasynda kózdelgen is-sharalardyń ýaqtyly iske asyrylýyn qamtamasyz etýdi, elektrondyq servıster men azamattardyń ótinishterin óńdeý júıesine jasandy ıntellekt sheshimderin engizýdi jedeldetýdi, sondaı-aq basty salalardaǵy sıfrlyq jobalardy iske asyrý kezinde qalalyq qyzmetter arasyndaǵy úılestirýdi kúsheıtýdi tapsyrdy.
Osy oraıda Darhan Satybaldy qalanyń tynys-tirshiligin qamtamasyz etetin júıelerge sıfrlyq sheshimder men jasandy ıntellekt tehnologııasyn engizý barysymen tanysyp, negizgi kásiporyndardyń dıspetcherlik qyzmetiniń jumysyn tekserdi. Qazirgi kezde qalada ınjenerlik jelilerdiń senimdiligin arttyrý úshin sıfrlyq monıtorıng júıeleri engizilip jatyr. Sýmen jabdyqtaý, jylýmen qamtý jáne elektr energetıkasy salalaryndaǵy kásiporyndardyń dıspetcherlik qyzmetiniń jumysymen, sondaı-aq qalanyń ınjenerlik ınfraqurylymyn basqarýda sıfrlyq sheshimder men jasandy ıntellekt tehnologııalaryn engizý barysymen tanysqan qala ákimi «Almaty Sý» memlekettik kommýnaldyq kásipornynyń dıspetcherlik qyzmetine keldi. Munda sý qubyry jáne káriz jelileri onlaın rejimde baqylanady. Qysym deńgeıin qadaǵalaýdy jáne apattyq brıgadalardyń jumysyn jedel úılestirýdi qamtamasyz etetin ortalyqtandyrylǵan basqarý júıesi biryńǵaı sıfrlyq kontýrǵa biriktirilgen. Bul táýekelderdi der kezinde anyqtaýǵa jáne naqty derekterge súıene otyryp sheshim qabyldaýǵa múmkindik beredi.
Kelesi nysan — «Almaty jylý júıesi» jaýapkershiligi shekteýli seriktestiginiń dıspetcherlik qyzmeti. Munda qalany jylýmen qamtýdy ortalyqtandyrylǵan basqarý júıesi jumys istep tur. Atalǵan júıe naqty ýaqyt rejiminde jelilerdiń jumys parametrlerin qadaǵalap, júktemeni taldaıdy jáne máseleli aýmaqtardy jedel oqshaýlaýǵa múmkindik beredi. Sıfrlyq platformalardy paıdalaný jylýmen qamtý júıesin neǵurlym dál ári boljamdy basqarýǵa negiz bolady. Sondaı-aq «Almaty elektr stansııalary» aksıonerlik qoǵamynyń ortalyqtandyrylǵan baqylaý pýnktinde de jasandy ıntellekt elementteri qoldanylatyn jańǵyrtylǵan beınebaqylaý júıesi engizilgen. О́ndiristik nysandarda 1,5 myńnan astam beınekamera ornatylyp, olar eńbek qaýipsizdigi, eńbekti qorǵaý, órtke qarsy talaptar men eńbek tártibiniń saqtalýyn baqylaý úshin paıdalanylady.
Beınetaldaý júıesin qoldaný quqyqbuzýshylyqtardy avtomatty túrde anyqtaýǵa, adamı faktordyń áserin azaıtýǵa jáne ortalyqtandyrylǵan baqylaý pýnkti arqyly jedel áreket etýge múmkindik beredi. Kásiporyn málimetinshe, byltyr maýsym-tamyz aılary aralyǵynda óndiristegi quqyqbuzýshylyqtar sany shamamen 66 paıyzǵa qysqarǵan. Bul engizilgen sıfrlyq sheshimderdiń praktıkalyq tıimdiligin rastaıdy.
Sonymen qatar birqatar nysanda úderisterdiń ashyqtyǵyn arttyrýǵa baǵyttalǵan avtomattandyrylǵan esepke alý júıeleri engizilgen.
Qorytyndylaı kele, ákim qalanyń tynys-tirshiligin qamtamasyz etetin júıelerge sıfrlyq sheshimder men jasandy ıntellekt tehnologııasyn engizý naqty nátıjege — negizgi ınjenerlik nysandardyń qaýipsizdigin, senimdiligin jáne turaqtylyǵyn arttyrýǵa baǵyttalýǵa tıis ekenin atap ótti. Bul baǵyttaǵy jumys jalǵasyp, tıimdi sheshimder kezeń-kezeńimen keńeıtiletin bolady.
