Bireý ony ǵylymǵa qarjy retinde salady, taǵy bireýi ónerge jumsaıdy, endi bireýi týǵan-týysy men otbasynyń qajetin óteýge beredi. 1 mıllıon dollardan asatyn júlde qarjysyna tipti keıbireýi úlken úı satyp alypty. Uly fızık Albert Eınshteın Nobel syılyǵyn alarynan eki jyl buryn – 1919 jyly-aq onyń aqshasyn burynǵy zaıyby Mıleva Marıchke berýge ýáde etipti. Syılyq qarjysy qolyna túskennen keıin ǵalym bergen ýádesinde turdy. Al ırlandııalyq qalamger Semıýel Bekket (1969 jylǵy syılyq ıegeri) júlde qarjysyn dostaryna taratyp bergen. Dostyqty bıik baǵalaǵan kisiniń is-áreketi de osylaı bolatyn shyǵar.
Al ǵylym salasy boıynsha Nobel alǵan kóptegen ǵalym syılyq aqshasyn ǵylym men qoǵam ıgiligine jumsaýdy jón kóripti. Amerıkalyq neırobıolog Pol Grıngard anasynyń qurmetine Pıorl Meıster Grıngard atyndaǵy júlde qoryn qurǵan. Ol bıomedısınalyq zertteýler salasyndaǵy áıel ǵalymdardy marapattaýǵa baǵyttalǵan. Sonymen birge nemis bıologi Krıstıan Nıýslıaın-Folhard bala kútimi men turmystyq kómek úshin áıel ǵalymdarǵa grant beretin ortalyq ashqan. Amerıkalyq kosmolog Djon Mazer astronomııa jáne kosmologııa salasyndaǵy stýdentterge arnalǵan stıpendııa baǵdarlamasyn ázirlegen.
Atalǵan úlken marapatty ıelengen qalamgerler syılyq aqshasyn qaıda jumsaǵany týraly aıtalyq. Alber Kamıý Fransııanyń bir buryshynan jaıly úı alyp, shyǵarmashylyqpen aınalysypty. Al Iýdjın O’Nıldiń Kalıfornııada shyǵys stılindegi shyǵarmashylyq úı saldyrǵanyn bildik. Osylaısha, Nobel syılyǵynyń qarjysy ıegeriniń qalaýyna saı kádege jaraıdy.
