Bul qyzmetti 2007 jyly alǵash ret Tama atty mysyq atqarǵan. Ol mysyqtyń súıkimdiligi sondaı, halyq sony kórýge bola temirjolǵa keletin bolǵan. Onyń segiz jyl migirsiz qyzmeti nátıjesinde jolaýshylar sany jylyna shamamen 300 myń adamǵa artty. Al ekonomıkalyq tıimdilik 1,1 mlrd ıennen asty. Sóıtip Tama shyǵynǵa batqan temirjol jelisin saqtap qalýǵa úlken úles qosty.
Tama 2015 jyly ómirden ótken soń onyń ornyn Nıtama basty. Ol bul qyzmette on jyl jumys istedi. 2025 jylǵy qarashada Nıtama 15 jasynda qaıtys boldy. Bul adam jasymen eseptegende shamamen 75 jylǵa teń. Qazir onyń ornyna shubar ala Entama taǵaıyndaldy.
Entamanyń mindetine jolaýshylardy qarsy alý, jarnamalyq naýqandarǵa qatysý jáne stansııa qonaqtarynyń kóńilin kóterý kiredi. Mysyqtyń jumys ýaqyty saǵat 10:00-den 16:00-ge deıin. Demalys kúnderi turaqty.
Vakaıama prefektýrasyndaǵy Kısı stansııasy arnaıy mysyq beınesinde qaıta jańǵyrtylǵan. Shatyry qulaqqa uqsaıdy, kireberisi aýyz pishininde, al terezeleri kózdi elestetedi. Sondaı-aq stansııa aýmaǵynda Tamaǵa arnalǵan ǵıbadathana bar. Sıntoıstik dástúr boıynsha ol temirjoldyń qamqorshy piri retinde tanylǵan.
