Batys Qazaqstan oblysy ishki ister departamentine tekserý júrgizilýde

ORAL. 12 mamyr. Batys Qazaqstan oblystyq ishki ister departamentiniń qyzmetine Qazaqstan Respýblıkasy Ishki ister mınıstrligi tarapynan tekserý júrgizilmek. Oǵan Oral qalasynda shyǵatyn aptalyq gazetter redaksııalarynyń birine joldanǵan domalaq aryz sebep bolǵan. Aty-jónderi kórsetilmegen shaǵym hattyń aıaǵyna bir aýyz sózben «Ishki ister departamenti ujymy» dep kórsetilgen. Bul týraly egemen.kz tilshisi habarlady. Aryzda departament basshysy Mahambet Abısatovtyń shekten shyǵatyn qatań tártip stılin talap etetini aıtylǵan. Sonyń ishinde ol kez kelgen jolmen qylmystyń ashylý deńgeıin kóterý jóninde qaraýyndaǵylardy qyspaqqa alatyn kórinedi. Domalaq aryz ıeleri buǵan kelispeıtinin aıta kelip, kóptegen polıseıler qajetti kórsetkishke qol jetkize almaǵan soń jasalǵan qylmysty amalsyzdan jasyrýǵa májbúr ekenin málimdegen. Mundaı isi úshin olardy prokýratýra taǵy «taıaqtaıtyny» belgili. Sonyń saldarynan saqshylar óz erikterimen qyzmetterinen ketip jatqanǵa uqsaıdy. Sonymen birge shaǵym hat ıeleri Abısatov qyzmettik qarym-qatynastarda qaraýyndaǵylardy ádep normasymen saı kelmeıtin sózdermen sybaıtynyn jazǵan. Eń sońynda ishki ister departamentindegi aryzdanýshylar Ishki ister mınıstrligi Qalmuhambet Qasymovtan departamentke tıisti tekserý júrgizip, onyń basshysyna qajetti shara qoldanýdy ótingen. О́z kezeginde ótken aptada «Qazaqstan Oral» telearnasynan berilgen brıfıng barysynda Batys Qazaqstan oblystyq ishki ister departamenti bastyǵynyń birinshi orynbasary Saǵat Mádıev eldi shýlatqan domalaq shaǵym hatqa qatysty: «Ishki ister mınıstrligi departament qyzmetine keshendi tekserý isin bastap ta ketti. Bizdiń jumysymyzda qandaı da bir teris is-árekettiń bar joǵyn osy tekserý anyqtaıtyn bolady», – dedi. Temir Qusaıyn. Derek: egemen.kz. Sýret: azh.kz.