Oralda ákimdik atyn jamylǵan alaıaqtar 200 mln. teńgeni qoldy qylǵan

ORAL. 12 mamyr. Batys Qazaqstan oblysynyń ortalaǵy - Oral qalasynda turǵyndarǵa «Qoljetimdi baspana» baǵdarlamasy boıynsha páter alyp beremiz» dep, halyqty aldap júrgen alaıaqtar qolǵa tústi. Bul týraly egemen.kz tilshisi habarlady. Olar ózderin ákimdikte isteımiz dep tanystyrǵan eken. Aldyn ala belgili bolǵan derekterge súıensek, osy kezge deıin 6 alaıaq 50 adamdy 200 mln. teńgeden astam shyǵynǵa batyrǵan. Atalǵan iske baılanysty 2014 jyldyń qańtarynda oblystyq ishki ister departamentiniń qyzmetkerleri alaıaqtyq derekteri boıynsha tergeý amaldaryn bastaǵan. Sodan beri úzdiksiz jalǵasyp kelgen tekserýdi taıaýda aıaqtady. Nátıjesinde ákimdik atyn jamylǵandar óz qurbandaryn kórsetken. Osy aralyqta polısııaǵa 26 adam aryzdanǵan. Budan keıin birden 20 qylmystyq is qozǵaldy. Batys Qazaqstan oblystyq ishki ister departamenti tergeý basqarmasynyń bastyǵy Maǵaýııa Qurmashevtyń aıtýynsha, turǵyndar ózderin pátermen «jarylqaýshylardyń» biri Qarlyǵan Hafızovaǵa 30-40 myń dollardan ustatqan. Bul somalar «páterlerdiń ishki qurylymy men sharshy metrine saı tólengen». Alaıaq áıel olardyń kóńilderinde kúdik qalmaýy úshin: «Úı qurylysy aıaqtaldy. Biraq munda barlyq páterler satylymǵa túsken joq. Sondyqtan memlekettik baǵdarlama boıynsha páter alǵysy kelgenderdiń maǵan jolyǵýlaryna bolady», – dep, sendirip otyrǵan. Alaıda, quqyq qorǵaý organdary anyqtaǵandaı, joǵaryda atalǵan 6 «jarylqaýshynyń» eshqaısysy memlekettik qyzmetke nemese ákimdikke esh qatysy joq. Soǵan qaramastan, olar ózderin beıne bir ákimdikte istep júrgendeı etip kórsete bilgen. Ákimdik ǵımaratynyń janynda, tipti onyń esiginiń qasynda esh ımenbesten, adamdarmen kezdesken. Bul jóninde Maǵaýııa Qurmashev: «Dál ákimdikte isteıtin adamdar sekildi ǵımaratqa kirip ketedi de, qaǵazdar alyp shyǵady eken. Sonda tómende kútip turǵandar olar óte jaýapty tulǵaǵa jolyǵyp shyqqandaryna kúmáni qalmaǵan», – dedi. Temir Qusaıyn. Derek: egemen.kz. Sýret: vesti.ru.