Qyzylordada sora ósirgen úsh azamat ustaldy

QYZYLORDA. 12 tamyz. Respýblıka aýmaǵynda júrgizilip jatqan «Kóknar» jedel-profılaktıkalyq sharasy barysynda qyzylordalyq polıseıler Aral aýdany, Jińishkequm eldi mekeninen shyǵysqa qaraı 45 shaqyrym jerde esirtki zatyna uqsas ósimdik ósip turǵan 5 alqapty anyqtady. Bul týraly egemen.kz tilshisi habarlady. Nátıjesinde 3704 túp sora ósimdigin kútip-baptap jatqan jerinen 57 jastaǵy, 45 jastaǵy jáne 32 jastaǵy úsh azamat ustaldy. Tekserý barysynda atalǵan ósimdiktiń jalpy salmaǵy 3 tonna 333 kelini quraıtyndyǵy belgili boldy. Sonymen qatar, seziktilerdiń jatyn oryndaryna tintý júrgizý kezinde, atalǵan aýmaqta ornalasqan kúrkeden jalpy salmaǵy 28 kelini quraıtyn 77 túp keptirilgen sora ósimdigi tabyldy. Qazirgi tańda, atalǵan úsh azamattyń ústinen Qylmystyq kodekstiń 300-baby, 1-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde. Úsh azamat ta ýaqytsha ustaý abaqtysyna qamaldy. Erjan Baıtiles. Derek: egemen.kz. Sýret: «QazAqparat».