Tehnologııa • 13 Qańtar, 2026

2028 jylǵa qaraı «aqyldy» sý esepteý qurylǵylary ornatylady

30 ret
kórsetildi
2 mın
oqý úshin

Úkimet otyrysynda О́nerkásip jáne qurylys vıse-mınıstri Qýandyq Qajkenov sýmen jabdyqtaý jáne sý burý júıelerin jańǵyrtý isindegi sıfrlandyrýdyń mańyzyn atap ótti, dep jazady Egemen.kz.

2028 jylǵa qaraı «aqyldy» sý esepteý qurylǵylary ornatylady

Foto: JI

Vıse-mınıstr kommýnaldyq ınfraqurylymdy turaqty paıdalanýdyń, júıeli basqarýdyń, baqylaýdyń jáne shyǵyndardy azaıtý baǵytynda atqarylyp jatqan sharalar týraly baıandady. 

Ulttyq joba aıasynda sý arnalary kásiporyndarynyń prosesterin kezeń-kezeńimen avtomattandyrý kózdelip otyr.

2026-2028 jyldary 3,6 mln-nan astam «aqyldy» sý esepteý qurylǵylaryn ornatý josparlanǵan. Bul sý shyǵyndaryn aıtarlyqtaı ońtaılandyrýǵa jáne jabdyqtyń qyzmet etý merzimin uzartýǵa múmkindik beredi.

«Otandyq jáne halyqaralyq sarapshylarmen birge Astana, Shymkent, Oral, Ekibastuz, Shahtınsk syndy 5 qaladaǵy sý arnalary qyzmetiniń jumysyn baǵalaý júrgizildi. Nátıjesinde prosesterdi ońtaılandyrý boıynsha usynystar daıyndaldy, birtutas sıfrlyq sheshimderdi jáne kezeń-kezeńimen engizýdi qarastyratyn tehnıkalyq-ekonomıkalyq negizdemeni daıyndaý úshin tapsyrma ázirlendi. Sýmen jabdyqtaý aspaptaryn ornatý boıynsha ótinimderdi qalyptastyrý maqsatynda ákimdikter men tabıǵı monopolııa sýbektilerimen jumys júrgizip jatyr», dedi Qýandyq Qajkenov.

Sonymen qatar Memleket basshysysynyń 2025 jylǵy 8 qyrkúıektegi Joldaýy aıasynda sý sektoryna halyqaralyq tájirıbeniń ozyq úlgilerin engizýdi tapsyrǵan. Osy maqsatta byltyr iri halyqaralyq jelilik operatorlar – Veolia, Suez jáne Aqualia kompanııalarymen yntymaqtastyq týraly memorandýmdarǵa qol qoıyldy. Qýandyq Qajkenovtiń aıtýynsha, mundaǵy maqsat aktıvterdi berý emes, memleket baqylaýyn saqtaı otyryp, basqarýshylyq quziretter men halyqaralyq úzdik tájirıbelerdi engizýge baǵyttalǵan. Qazirgi ýaqytta elimizdiń sý ınfraqurylymyn basqarýdaǵy tájirıbesi men quzyrettiligin keńeıtý úshin birneshe azııalyq kompanııamen kelissózder jalǵasyp jatyr.

Aıta keteıik, Qýandyq Qajkenov búgingi Úkimet otyrysynda elimizdiń barlyq eldi mekeni 100% aýyz sýmen qamtylǵanyn jetkizdi.

Byltyr el óńirlerindegi birneshe eldi mekenge taza aýyz sý berilgenin habarlaǵanbyz. Máselen, ótken jyly shalǵaıdaǵy Aqbastyǵa sý jetip, Syr óńiri aýyz sý máselesin tolyq sheshti.

Sondaı-aq, Ulytaý oblysyndaǵy Keńgir aýyly gazǵa qosylyp, taza aýyz sýmen qamtyldy.

Mańǵystaýda da aýyz sý tapshylyǵy joq ekeni habarlandy.