– Sizdiń, AQSh-qa qadam basýyńyzǵa ne túrtki boldy?
– Bala kezden shıraq boldym, jańany kórmekke, úırenýge asyqpyn. Ata-anam jumysbasty, kóbine ata-ájemniń tárbıesin kórdim. Olar erekshe temirdeı tártip pen jaýapkershilikke berik jandar-etin. Bilimge qushtarlyǵymdy ashqan da – sol kisiler. Sodan bolar, kóp dúnıege qyzyǵýshylyǵym basym. Oılaǵan isti aıaǵyna deıin jetkizbeı qoımaıtyn qaısarlyq, tabandylyq degen qasıetter de etene shaqtan boıyma ábden sińdi. Qarap otyrsam, ár tańdaýyma negiz bolǵan da, ómirdiń ár kezeńinde jańa ortaǵa tez beıimdelýge, belgisizdikten qoryqpaýǵa, óz múmkindigińdi keń aýqymda synaýǵa jetelegen osy dúnıeler eken.
Qazaqstanda halyqaralyq qatynastar jáne qarjy mamandyǵyn oqydym. Odan keıin «Bolashaq» baǵdarlamasymen Manchester ýnıversıtetiniń magıstratýrasyn da sátti aıaqtadym. Elge oralǵan soń, Almatydaǵy tanystarymmen birlese ýnıversıtetterge Wi-Fi ınfraqurylymy men ınternet sheshimderin quratyn startap ashýdy jón sanadyq. Bul jobany bes jyl boıy úzdiksiz damytyp, naryqqa beıimdedik. Kompanııaǵa ınvestor tartylyp, joba tolyq satylǵan sátte men úshin bul jobanyń aıaqtalýy ǵana emes, kásibı jáne jeke ósýimniń jańa kezeńi bastalatynynyń belgisi edi. Álemdik deńgeıdegi, ásirese analıtıka men tehnologııadaǵy eń aldyńǵy qatarly ortalarda tájirıbe jınaǵym keldi. Sóıtip, Amerıkaǵa 2016 jyly kóship keldim. Birden mamandyǵymdy túbegeıli ózgertken joqpyn, biraq kásibı baǵytym aıtarlyqtaı naqtylandy desem, bolady. Negizgi kásibı qalyptasýyma INTO University Partnerships kompanııasyndaǵy eńbek etken jyldarym sebep boldy. Bul uıym ýnıversıtettermen seriktestik ornatyp, jahandyq deńgeıde úlken jobalardy iske asyryp jatty, dál osy kezeńde taldaýshy retinde komandaǵa qosyldym. Munda stýdenttik qabyldaýdy boljaý, qarjylyq modelder qurý jáne ár seriktestiktiń uzaqmerzimdi tabysyna áser etetin faktorlardy baǵalaý jumystarymen aınalystym. Osylaısha, sheteldiń men-men degen ýnıversıtetterinen aıaqtanǵandarmen ıyq tirese eńbek etip, salada alǵan bilimimdi, statıstıkalyq biligimdi jáne analıtıkalyq qabiletimdi jańa deńgeıge kóterdim. Bul qadam men úshin tek geografııalyq turǵyda oryn aýystyrý emes, ishki erik-jigerimdi shyńdaǵan, kásibı damý jolymda mańyzdy beles boldy dep aıta alamyn.
– «Bloomberg» korporasııasyna qalaı keldińiz?
– «Bloomberg» kompanııasyna shaqyrylýyma INTO-daǵy iri jobalarmen aınalysýym, ulttyq deńgeıdegi konferensııalarda jasaǵan baıandamalarym, jarııalanǵan zertteýlerim men áriptesterimniń kásibı usynystary áser etti. Bul kompanııaǵa men bar-joǵy bir-aq ret ótinish berdim. Irikteý úderisi ońaı bolǵan joq: suhbat shamamen bes aıǵa sozyldy. Árbir kezeńde úmitkerdiń analıtıkalyq oılaý qabileti, ónimdi tereń túsinýi, máseleni sheshý logıkasy, kommýnıkasııalyq daǵdylary men strategııalyq kózqarasy jan-jaqty baǵalandy. Bul tek tehnıkalyq bilimdi emes, keń aýqymdy oılaı alýdy talap etetin úderis boldy. Menińshe, osy kezeńderde meniń analıtıkalyq ıkemdiligim men kúrdeli máselelerdi júıeli túrde taldaı alý qabiletim «Bloomberg» komandasynyń nazaryn aýdardy. Búginde «Bloomberg»-te eńbek etip júrgen qazaq qyzdarynyń biri bolý – men úshin tek kásibı jetistik emes, sonymen qatar el namysyn halyqaralyq deńgeıde tanytýdyń bir joly. Árıne, jaýapkershilik bar, sonyń ózinde erekshe maqtanysh sezimi basym.
– Qazirgi atqaryp júrgen qyzmetińiz týraly tolyǵyraq aıtyp berseńiz.
– Qazirgi tańda «Bloomberg Law» bóliminde Senior Data Analytics Manager qyzmetin atqaramyn. Negizgi mindetim – zań salasyndaǵy tutynýshylardyń minez-qulqyn tereń taldaý. Atap aıtqanda, paıdalanýshylardyń platformany qalaı qoldanatynyn, ónim ishinde qandaı kedergilerge tap bolatynyn, qaı tusta toqtaıtynyn, neni izdep, qandaı fýnksııalarmen jumys istegisi keletinin zertteımin. Bul zertteýler ónimdi jetildirýge jáne klıent tájirıbesin jaqsartýǵa tikeleı áser etedi.
Bul kompanııada bir komandanyń ishinde zańgerler, ınjenerler, data-ǵalymdar men UX zertteýshiler sııaqty túrli salanyń mamandarymen birge jumys isteımin. Árqaısynyń oılaý júıesi men máselege kózqarasy bólek. Osyndaı ortada óz ornyńdy tabý men úshin úlken mektep boldy. Bul tájirıbe kásibı kókjıegimdi keńeıtip qana qoımaı, adamdarmen qarym-qatynas qurý qanshalyqty tereń ári mańyzdy qabilet ekenin túsinýge jol ashty.
Negizinen, data analıtıka salasyna bet burǵan ýaqytta shamamen 3–5 aıdy onlaın platformalar arqyly SQL, Python, Power BI, logtaý júıeleri, A/B testing sııaqty negizgi quraldardy meńgerdim. Biraq «Bloomberg»-te jumys istegen jyldary derektermen jumys isteýdiń eń kúrdeli deńgeılerin tájirıbe júzinde tereńirek ıgerdim.
– Aldaǵy 5–10 jylda jas mamandar úshin eń mańyzdy daǵdy qandaı bolady? Qaı mamandyqtarǵa qazirden bastap erekshe mán bergen jón?
– Eń mańyzdy daǵdy – úırene bilý men tez beıimdelý qabileti. Tehnologııalar óte jyldam ózgerip jatyr: búgin ózekti quraldar birneshe jyldan keıin eskirip qalýy múmkin. Sondyqtan naqty bir baǵdarlamalaý tilin ǵana meńgerý jetkiliksiz, eń bastysy – derekterdiń qalaı jumys isteıtinin, modelderdiń qalaı qurylatynyn, taldaýdyń sapasyn qalaı baǵalaý kerektigin túsiný.
Ekinshi mańyzdy qabilet – naqty baǵyt boıynsha mamandyq tańdaý. Tehnologııa men bıznesti, derekter men dızaındy, jasandy ıntellekt pen etıkany baılanystyra alatyn mamandar eń joǵary suranysqa ıe bolady.
Úshinshi daǵdy – kommýnıkasııa. Qanshalyqty myqty tehnıkalyq maman bolsań da, óz oıyńdy túsindire, qorǵaı, nátıjeni usyna almasań, yqpalyń shekteýli bolady. Dál qazirgi trendpen keńes beretin mamandyqtar qatarynda – Data Science pen AI/ML, Product Management, UX Research, Cybersecurity, AI Ethics pen Governance. Eń bastysy – trendtiń sońynan soqyr erý emes, shyn máninde qyzyqtyratyn baǵytty tańdaý. Sebebi qyzyǵýshylyq bolmasa, ózgeris qarqynyna tótep berý qıyn.
– Áńgimeńizge rahmet.
Áńgimelesken –
Zeıin ERǴALI,
«Egemen Qazaqstan»
