Qandasymyzdyń qarsylasy, 32 jastaǵy Tıhýana qalasynyń týmasy sporttyń bul túrimen bozbala shaǵynan shuǵyldanyp keledi. 2011 jyldan beri túrli jarysqa qatysyp júr. Sol aralyqta 34 kezdesý ótkizip, 23 ret jeńiske jetti. 16 básekede aıqyn basymdyq tanytty. Jeti ret utylyp, eki jekpe-jekte teń esep tirkeldi. Meksıkalyq marǵasqanyń UFC-de kúsh synasyp júrgenine 10 jylǵa jýyqtady. Bul rette de eleýli tabystarǵa qol jetkizdi. 2021 jyldyń maýsymynda brazılııalyq Deıvıson Fıgeıredýdi qylqyndyryp tastap, promoýshenniń chempıondyq ataǵyn oljalady. Arada jeti aı ótken soń dál sol faıterden utylyp, altyn belbeýden aıyryldy. 2023 jyldyń qańtarynda Fıgeıredýmen taǵy da aıqasty. Bul joly Morenonyń mereıi ústem bolyp, chempıondyq tájdi qaıta ıelendi. Biraq «Adam óltirgish bala» (Brendonnyń búrkenshik esimi) sol jyldyń shilde aıynda Brazılııanyń betkeustary Aleshandre Pantojaǵa ese jiberip, tuǵyrdan tústi.
Brendon Morenonyń UFC-degi rekordy – 11 jeńis, 6 jeńilis, 2 ret teń tústi. Sońǵy ret ol byltyrǵy 6 jeltoqsanda Las-Vegasta japo-nııalyq Tasýra Taıradan oısyraı utyldy. Soǵan qaramastan qazir Brendon UFC-diń reıtınginde 5-orynda tur.
A.Almabaev – Jambyl oblysy, Sarysý aýdanynyń týmasy. Jasy 31-de. Sporttyq mansabyn 2013 jyly bastady. Sol aralyqta 26 ret oktagonǵa shyǵyp, 23 márte mereıi ústem boldy. 13 qarsylasyn esinen tandyrdy. UFC-degi rekordy – 6 jeńis, 1 jeńilis. Eki jarym jyldan asa ýaqyt aralyǵynda «Zulfıkar» (Asýdyń búrkenshik esimi) Ode Osborn (Iаmaıka), Sı-Djeı Veıgara (AQSh), Hose Djonson (AQSh), Mateýs Nıkolaý (Brazılııa), Hose Ochao (Perý), Aleks Perez (AQSh) syndy sportshylardy sabady. Asýdyń áli tek Manel Kapege (Porýgalııa) jetpedi. Qandasymyz sońǵy eki jekpe-jegin jarqyn jeńispen aıaqtady. Bul kúnderi Almabaev UFC reıtınginde 7-oryndy enshilep otyr.
