Foto: gov.kz
Edil Jańbyrshın óńirdegi kásipkerlermen kezdesý barysynda arnaıy reestrden sertıfıkat alý máselesi qozǵalǵanyn aıtty. Depýtattyń aıtýynsha, О́nerkásip jáne qurylys mınıstrligi kásipkerlerge atalǵan sertıfıkatty alýǵa 1 aı ýaqyt bergen. Osy talapty oryndaý úshin saıtqa jappaı kirý barysynda saıt júktemeni kótere almaı birneshe ret isten shyqqan.
Sondaı-aq ol elimizde gaz óndiretin sheteldik kompanııanyń atalǵan bazaǵa kire almaı otyrǵanyna da nazar aýdaryp, máseleni sheshý jolyn О́nerkásip jáne qurylys vıse-mınıstri Oljas Saparbekulynan surady.
О́z kezeginde vıse-mınıstr reestrdiń tehnıkalyq máselelerin sheshý jumystary júrgizilip jatqanyn atap ótti.
«Al gaz óndiretin kompanııanyń máselesi Energetıka mınıstrliginiń quziretine kiredi. Mınıstrlik tehnıkalyq operasııalardy belgileıdi. Sol arqyly shyǵarylǵan ónim otandyq dep sanalady. Atalǵan saýaldyń sheshimin tabý úshin Energetıka mınıstrligimen birlese jumys isteýge daıynbyz», dedi Oljas Saparbekuly.
Aıta keteıik, búgingi Májilis otyrysynda depýtat Temir Qyryqbaev sábiz eksportyna tyıym salýǵa qatysty sharýalardy alańdatyp otyrǵan máselerdi kóterip, Premer-Mınıstrdiń orynbasary – Ulttyq ekonomıka mınıstri Serik Jumanǵarınge saýal joldady.
Al «AMANAT» partııasy fraksııasynyń múshesi Mútáli Ábútálip el aýmaǵynda jasyryn baqylaýǵa arnalǵan tehnıkalyq qurylǵylardyń baqylaýsyz aınalymy men jańa býyndaǵy avtomobılder arqyly jeke derekterdiń shetelge ketý qaýpine nazar aýdardy.
