Komıssııa tóraǵasy Djýlı Inman-Granttyń aıtýynsha, jetekshi platformalar 16 jasqa tolmaǵandardyń akkaýnt ashýyna jol bermeý úshin naqty qadamdar jasap jatyr. Ol alǵashqy nátıjelerdi oń baǵalap, bul baǵyttaǵy jumys jalǵasatynyn jetkizdi. Sonymen birge balalardyń jasyn anyqtaý tetikterin jetildirý jáne zańdy aınalyp ótý áreketterin boldyrmaý úshin tehnologııalyq kompanııalarmen birlesken sharalar kúsheıtilmek.
Buǵan qosa komıssııa keıbir balalardyń tyıymdy aınalyp ótýdiń jolyn tabýy múmkin ekenin joqqa shyǵarmaıdy. Degenmen negizgi maqsat – jastarǵa keletin zııandy azaıtý jáne qoǵamdaǵy qalypty tártipti qalpyna keltirý.
Aýstralııa premer-mınıstri Entonı Albaneze de bul qadamdarǵa túsinistikpen qaraıtynyn aıtty.
Alaıda quqyq qorǵaý uıymdary bul máselege saqtyqpen qarap otyr. Digital Rights Watch uıymynyń tóraǵasy Lızzı O’Shı akkaýnttardyń kóptep óshirilýin tabystyń basty ólshemi deýge bolmaıtynyn aıtty.
«Keıbir jasóspirimder ózderin qoldaıtyn ortasynan aıyryldy. Al keıbirine bul shekteý kerisinshe zııan tıgizdi», dedi ol.
Eske salsaq, Aýstralııada 16 jasqa tolmaǵandarǵa áleýmettik jelilerdi paıdalanýǵa tyıym salatyn zań 2025 jylǵy 10 jeltoqsanda kúshine endi.
Shekteý Facebook, Instagram, Kick, Reddit, Snapchat, Threads, TikTok, Twitch, X jáne YouTube platformalaryna qatysty. Zań talaptaryn oryndaý tolyqtaı tehnologııalyq kompanııalardyń moınyna júktelgen. Eger olar barlyq qajetti sharany qabyldamasa, 49,5 mln aýstralııalyq dollarǵa deıin aıyppul salynýy múmkin.
