Bul qubyr Grekııa men Túrkııa shekarasynan bastalyp, Grekııa men Albanııa aýmaǵy arqyly ótip, Italııanyń ońtústigine jetedi. Odan ári gaz Avstrııa men Germanııaǵa tasymaldanady.
Socar kompanııasynyń málimetinshe, Italııa arqyly Avstrııa men Germanııaǵa jetkizilimder Ázerbaıjan gazynyń Eýropadaǵy eksport geografııasyn keńeıtedi. Osylaısha, Ázerbaıjan gazyn ımporttaıtyn elderdiń sany 16-ǵa jetti.
Eýropa elderi Reseıdiń Ýkraınaǵa qarýly basqynshylyǵynan keıin reseılik gazǵa táýeldilikti azaıtýǵa umtyldy. Sonyń nátıjesinde Ázerbaıjan gazyna suranys artty. 2025 jyldyń maýsym aıynda Socar Germanııanyń Sefe energetıkalyq holdıngimen on jyldyq kelisimge qol qoıdy. Kelisim boıynsha jylyna 1,5 mıllıard tekshe metr gaz jetkiziledi.
Sefe buǵan deıin Gazprom Germania dep atalǵan. 2022 jylǵy energetıkalyq daǵdarys kezinde Germanııa úkimeti kompanııany bankrottan qutqaryp qalǵan bolatyn.
Socar deregine súıensek, Avstrııaǵa jylyna 1 mıllıard tekshe metrge deıin gaz jetkizý múmkindigi bar. 2025 jyly Ázerbaıjannyń Eýropaǵa gaz eksporty jalpy kólemde 12,8 mıllıard tekshe metrdi qurady. Aldaǵy ýaqytta jetkizilimdi arttyrý ınvestısııalarǵa jáne gaz qubyrlary ınfraqurylymynyń ótkizý qabiletin keńeıtýge baılanysty bolmaq.
