Emhana alǵashqy medısınalyq-sanıtarlyq, shuǵyl, josparly, mamandandyrylǵan jáne joǵary tehnologııalyq medısınalyq kómek kórsetýge arnalǵan zamanaýı joǵary tehnologııalyq jabdyqtarmen qamtylǵan. Medısınalyq mekeme Qosshy qalasynyń 100 myńnan astam turǵynyna qyzmet kórsetedi.
Jobanyń ınvestory – «VIAMEDIS KOSSHY» JShS, jalpy quny shamamen 30 mlrd teńgeni quraıdy. Joba memlekettik bıýdjetten qarjy bólinbeı, kompanııanyń jeke qarajaty esebinen tolyqtaı júzege asyryldy.
Densaýlyq saqtaý mınıstri Aqmaral Álnazarova Qosshy turǵyndaryn qala ómirindegi mańyzdy oqıǵamen quttyqtap, emhana ujymyna sáttilik tiledi.
Jyl sońyna deıin 350 tósek-orynǵa arnalǵan stasıonardyń qurylysy aıaqtalady dep josparlanýda, onyń ishinde Qosshy qalasy men Aqmola oblysynyń Shortandy, Ereımentaý, Egindikól, Arshaly, Qorǵaljyn, Selınograd jáne Astrahan aýdandary turǵyndaryna arnalǵan 50 reabılıtasııalyq tósek qarastyrylǵan. Jalpy emhana men stasıonarda 700-den astam turaqty jumys orny ashylady. Sondaı-aq ınvestor medısınalyq qyzmetkerlerge arnalǵan pansıonat pen turǵyn úı salýdy josparlap otyr.
«Emhana halyqaralyq standarttarǵa saı salynǵan. Qurylys bastalǵan sátten bastap biz reanımasııalyq jáne reabılıtasııalyq bólimshelerge qajetti jabdyqtar boıynsha óz usynystarymyzdy berdik. Bul jobanyń bolashaǵy zor», dep pikir bildirdi «Eńbek eri» ataǵynyń ıegeri, joǵary sanatty neırohırýrg-dáriger, medısına ǵylymdarynyń doktory, Serik Aqsholaqov.
Aıta keteıik, sońǵy eki jylda Aqmola oblysynda 38 medısınalyq nysan salyndy. Bul aýyldyq eldi mekenderdiń 75 myńnan astam turǵynyna medısınalyq kómekke qoljetimdilikti qamtamasyz etti. Iri jobalardyń biri – Birjan sal aýdanynda salynǵan kópsalaly aýdanaralyq aýrýhana. Sonymen qatar Atbasar aýdandyq aýrýhanasynyń negizgi korpýsy kúrdeli jóndeýden ótti, Kókshetaý qalasynda 630 tósek-orynǵa arnalǵan kópsalaly aýrýhananyń qurylysy júrgizilýde, oblystyq balalar aýrýhanasynyń alty qabatty korpýsy jóndeýi júrgizilýde, «Bolashaq» ońaltý ortalyǵynyń kúrdeli jóndeýi aıaqtaldy.
