Foto: Saýda jáne ıntegrasııa mınıstrligi
Pavılon iskerlik dıalog alańy retinde qyzmet atqaryp, eksporttyq áleýetti tanystyrýǵa jáne ónerkásiptik kooperasııanyń keleshegin talqylaýǵa múmkindik berdi. Ekspozısııada Qazaqstannyń aýyl sharýashylyǵy ónimderin óndirý men tereń óńdeý, zamanaýı agrotehnologııalardy engizý jáne ornyqty agrojúıelerdi damytý baǵytyndaǵy múmkindikteri keńinen kórsetildi. Pavılon nemis jáne halyqaralyq seriktester tarapynan joǵary qyzyǵýshylyq týdyryp, Qazaqstan ónimderi men birlesken jobalarǵa degen suranystyń artyp kele jatqanyn dáleldedi.
Halyqaralyq konferensııada Saýda jáne ıntegrasııa mınıstri Arman Shaqqalıev bastaǵan delegasııa «Jasyl apta» aıasyndaǵy agrarlyq saıasat, bıznes jáne halyqaralyq uıymdar ókilderin toǵystyrǵan negizgi is-sharalarǵa qatysty.
GFFA aıasynda Arman Shaqqalıev birqatar halyqaralyq áriptespen ekijaqty kezdesýler ótkizdi. Atap aıtqanda, Germanııanyń Azyq-túlik, aýyl sharýashylyǵy jáne óńirlik sáıkestik jónindegi federaldyq mınıstri Aloıs Raınermen, Germanııanyń Ekonomıka jáne energetıka federaldyq mınıstrliginiń stats-hatshysy Tomas Shtefenmen, Nemis ekonomıkasynyń Shyǵys komıtetiniń atqarýshy dırektory Mıhael Harmspen, sondaı-aq Dúnıejúzilik saýda uıymy Bas dırektorynyń orynbasary Jan-Marı Paýgammen kelissózder júrgizildi. Taraptar saýdany keńeıtý, kedergilerdi azaıtý, azyq-túlik jetkizý tizbekteriniń turaqtylyǵy jáne ózara naryqtardaǵy qatysýdy kúsheıtý máselelerin talqylady.
Qazaqstan men Germanııa týrızm salasyndaǵy seriktestikti keńeıtedi
Qazaqstan tarapy Nemis agrobıznes alıansy uıymdastyrǵan salalyq pikirtalastarǵa da belsendi qatysty. Onyń ishinde ornyqty sý paıdalaný men ınnovasııalyq agrotehnologııalarǵa arnalǵan paneldik sessııa jáne «Kazakhstan – Germany Agro & Water Nexus» dóńgelek ústeli ótti. Bul alańdar taraptarǵa naqty kooperasııa úlgilerin, birlesken pılottyq jobalardy jáne tehnologııa transferin talqylaýǵa múmkindik berdi.
Is-sharalar barysynda Qazaqstan men Germanııa arasyndaǵy saýda-ekonomıkalyq baılanystardyń nyǵaıyp kele jatqany atap ótildi.
2025 jyldyń qańtar – qarasha aılarynyń qorytyndysy boıynsha eki el arasyndaǵy taýar aınalymy 3,91 mlrd AQSh dollaryn qurady. Qazaqstannyń Germanııaǵa eksporty 7,9 paıyzǵa ósip, 1,17 mlrd AQSh dollaryna jetti. Bul nemis naryǵynyń Qazaqstan jetkizýshileri men joǵary qosylǵan quny bar ónimderge degen turaqty qyzyǵýshylyǵyn kórsetedi.
Sapardyń mańyzdy praktıkalyq nátıjeleriniń biri – Arman Shaqqalıev pen Nemis ekonomıkasynyń Shyǵys komıtetiniń atqarýshy dırektory Mıhael Harms arasynda naýryz aıynda bıznes pen salalyq vedomstvolardyń qatysýymen beınekonferensııa ótkizý jónindegi ýaǵdalastyq boldy. BKS aıasynda agroónerkásiptik keshen men eksportqa baǵdarlanǵan salalardaǵy naqty kooperasııalyq jobalar egjeı-tegjeıli talqylanady. Sonymen qatar taraptar sáýir aıynda Germanııa delegasııasynyń Qazaqstanǵa saparyn uıymdastyrý josparyn rastady. Bul sapar barysynda birlesken ınvestısııalyq jáne óndiristik bastamalardy iske qosýǵa basymdyq beriledi.
